Presidenti i Sirisë, Ahmed al-Sharaa, është takuar në Damask me një delegacion amerikan të kryesuar nga i dërguari i posaçëm, Tom Barrack, për t’i diskutuar zhvillimet e fundit rajonale dhe çështje me interes të ndërsjellë.
Presidenca siriane njoftoi se takimi u mbajt në Pallatin e Popullit në kryeqytet dhe u ndoq edhe nga ministri sirian i Punëve të Jashtme, Asaad al-Shaibani.
Deklarata nuk dha detaje të tjera mbi agjendën apo rezultatet e bisedimeve.
Më herët, sipas televizionit Alikhbariah, Barrack tha se Siria “vazhdon të impresionojë me strukturën e saj shoqërore, si vertikalisht ashtu edhe horizontalisht, nën udhëheqjen e Sharaas”.
Komentet e tij erdhën gjatë nënshkrimit të një memorandumi mirëkuptimi ndërmjet Kompanisë Siriane të Naftës dhe kompanisë amerikane të naftës Chevron, si dhe Power International Holding me bazë në Katar, për kërkime për naftë dhe gaz natyror në ujërat territoriale të Sirisë.
Barrack tha se Chevron është ndër kompanitë më të shquara energjetike në botë dhe zakonisht vepron në përputhje me politikat e ShBA-së, duke shtuar se ky partneritet përfaqëson një “hap transformues” drejt riformësimit të imazhit të Sirisë pas viteve të vështirësive.
“Udhëheqja politike (siriane) është një gur themeli i rimëkëmbjes dhe stabilitetit dhe investimi në sektorin e energjisë mund ta hapë rrugën për vende pune dhe përmirësim të kushteve të jetesës në Siri”, shtoi Barrack.
Më 25 janar, Kompania Siriane e Naftës njoftoi se ekipet e saj teknike kishin nisur nxjerrjen e naftës nga fushat e rikthyera nga ushtria nga grupi SDF.
