Меѓународниот кривичен суд (МКС) ја осуди одлуката на американскиот претседател Доналд Трамп да воведе санкции против судот.

„МКС ја осудува американската наредба со која се обидуваат да воведат санкции врз нејзините службеници и да ја поткопаат нивната независна и непристрасна судска работа. Судот цврсто стои со својот персонал и е посветен да продолжи да обезбедува правда и надеж за милиони невини жртви на злосторства ширум светот, во сите ситуации пред него“, се вели во соопштението на МКС.

Се додава дека МКС ги повикува своите 125 земји-членки, граѓанското општество и сите народи во светот да се обединат за правда и основните човекови права.

Трамп потпиша извршна наредба за санкционирање на МКС во Хаг за напади врз Соединетите држави и нивните сојузници, како што е Израел, откако Судот издаде налог за апсење на израелскиот премиер Бенјамин Нетанјаху за злосторства против човештвото во Газа.

Наредбата вклучува воведување финансиски и визни санкции против „поединци и членови на нивните семејства кои помагаат во истрагите на МКС во кои се вклучени американски државјани или сојузници“, се вели во документот што го видел Си-Ен-Ен.

МКС, основан во 2002 година, има задача да суди за воени злосторства, злосторства против човештвото и геноцид во ситуации кога земјите-членки не се во можност или не сакаат сами да го сторат тоа.

САД, исто како и Израел не се членка на МКС.