Гласачите во американската сојузна држава Висконсин во вторникот ја избраа Сузан Крафорд за судија во државниот Врховен суд, задржувајќи го либералното мнозинство од 4-3 во судот, што претставува неуспех за претседателот Доналд Трамп и неговиот сојузник милијардер Илон Маск, кои го поддржаа нејзиниот конзервативен ривал.

Изборите нашироко се сметаа за „референдум“ за претседателствувањето на Трамп, а кампањата стана најскапиот судски натпревар во историјата на САД со повеќе од 90 милиони долари потрошени од кандидатите, партиите и другите групи, според Центарот Бренан на Универзитетот во Њујорк.

Крафорд го победи конзервативецот Бред Шимел, поранешен републикански државен јавен обвинител и исто така окружен судија, кој го призна поразот во телефонски повик со Крафорд и во говорот пред неговите поддржувачи. 

Крафорд имаше водство од девет процентни поени по преброените 88 отсто од гласовите.

Илон Маск и политичките групи поврзани со него потрошија повеќе од 21 милион долари за поддршка на Шимел. Крафорд ја опиша трката како натпревар меѓу неа и милијардер од друга држава.

„Морам да ви кажам, како мало девојче кое порасна во Чипева Фолс, никогаш не замислував дека ќе се борам со најбогатиот човек на светот за правда и Висконсин. И ние победивме“, им порача Крафорд на своите поддржувачи на прославата во Медисон, главниот град на државата.

Трамп избра да не ги коментира изборите за Врховниот суд во објава на социјалните мрежи.

Демократите ја прославија победата, нарекувајќи го резултатот во Висконсин прв чекор кон нивната цел да го вратат Претставничкиот дом во 2026 година. 

„Вечерва, жителите на Висконсин решително го отфрлија влијанието на Елон Маск, Доналд Трамп и специјалните интереси на милијардерите“, рече Кен Мартин, претседател на Демократскиот национален комитет, во изјавата.

Во уште еден тест за популарноста на Трамп, двајца републиканци од Флорида победија на специјалните избори за пополнување на испразнетите места во Претставничкиот дом на САД создадени со влезот на претходно избраните претставници во кабинетот на Трамп.

Овие победи им даваат на републиканците мнозинство од 220-213 во Претставничкиот дом.

Се очекуваше републиканците лесно да ги задржат двете места, па партиите внимаваа колку демократите можат да се приближат.

Во една област која ја опфаќа Дејтона Бич, републиканскиот државен сенатор Ренди Фајн го победи демократот Џош Веил, наставник во државно училиште. Фајн освои околу 14 процентни поени, откако Мајкл Волц, сега советник за национална безбедност на Трамп, го освои местото со 33 поени во ноември.

Во другата трка околу Пенсакола, републиканскиот државен финансиски директор Џими Патронис го победи демократот Геј Валимонт, активист за спречување на насилство. Патронис победи со речиси 15 процентни поени, откако Валимонт загуби од Мет Гаец, некогашниот кандидат на Трамп за државен обвинител, за 32 процентни поени во ноември.