Астон вила го освои трофејот од Лигата на Европа, откако во финалето на стадионот на Бешикташ во Истанбул, славеше со убедливи 3:0 над Фрајбург.
За екипата од Бирмингем ова е само трет европски трофеј во клупската историја, но и прв по 1982 година, кога триумфираа во Европскиот куп, пандан на денешната Лига на шампиони, како и во европскиот Супер куп истата година.
Астон вила го најави триумфот уште во финишот од првото полувреме, кога Тилеманс погоди во 41. минута, а Буендиа длабоко во судиското продолжение зголеми на 2:0.
Конечните 3:0 ги постави Роџерс во 58. минута.
За тренерот на Астон Вила, Унаи Емери, ова беше вкупно петти трофеј од Лигата на Европа, а до него дојде со трета различна екипа, откако претходно славеше и со Севиља (трипати) и со Виљареал.
