Новак Ѓоковиќ по пауза од три години ќе игра во финалето на Отвореното првенство на Австралија и ќе се обиде да дојде до 11. трофеј на првиот гранслем-турнир во годината откако во драматичен меч славеше над Јаник Синер со 3:2.

Српскиот тенисер во финалето ќе игра против Карлос Алкараз, кој со 3:2 го победи германскиот тенисер Александар Зверев.

Србинот во полуфиналето, кое траеше над четири часа, покажа дека и покрај возраста, сè уште може да игра на врвно ниво и да ги победува младите ѕвезди на овој спорт.

За Ѓоковиќ ова е прва победа над Синер по седум порази во низа, односно по повеќе од две години.

Мечот започна катастрофално за Ѓоковиќ, со оглед дека го загуби првиот сервис за водство на Синер од 2:0, а на крајот од сетот тоа значеше и 6:3 за Синер. Слично сценарио имаше и во вториот сет, но овојпат во корист на Србинот. Ѓоковиќ врати со 6:3 за израмнување на 1-1, откако направи брејк во четвртиот гејм.

Во третиот сет Синер се врати во водство, откако го доби сетот со 6:4 со брејк во последниот, десетти гејм. Ѓоковиќ го доби четвртиот сет со идентични 6:4, но со брејк уште во првиот гејм.

Во одлучувачкиот сет, Ѓоковиќ направи брејк во седмиот гејм, но Синер веднаш можеше да врати со рибрејк, бидејќи имаше 40-0 на сервис на противникот. Сепак, Србинот успеа да се врати и да го одбрани сервисот.

Во последниот гејм, Ѓоковиќ не искористи две меч-топки, но успеа да го направи тоа од трет обид и да се пласира во финалето, каде што за противник ќе го има Карлос Алкарас.

Шпанецот се пласираше во финалето на Отвореното првенство на Австралија откако во неверојатно драматична пресметка го победи Александер Зверев со 3-2 во сетови (6:4, 7:6, 6:7, 6:7, 7:5), по пет и пол часа атомски тенис. Титулата во Мелбурн е единствената што му недостига на Алкарас досега во кариерата.

Ако ја освои, ќе стане најмладиот тенисер кој ги освоил сите четири Гренд слем турнири.

Шпанецот подобро го отвори мечот и го освои првиот сет со 6:4 во гемови. Потоа следеше вистинска драма, дури три сета кои се решаваа во тај брејк.

Алкарас го доби и вториот сет со 7:6 и се чинеше дека отпорот на Зверев е скршен.

Сепак, Германецот се врати во германски стил со максимално борбен карактер. Зверев ги доби драматичните поени во следните два сета, во кои повторно се играше тај-брејк и мечот продолжи во финален петти сет.

Пет и пол часа играа двајцата тенисери, публиката се одушевуваше на секој поен, а максимално драматично беше и во петтиот сет.

Алкарас ја имаше првата меч-топка во 12. гем од финалниот сет и успеа да ја искористи за конечни 7-5 во гемови и пласман во финалето.