Се очекува британскиот премиер Кир Стармер да се обрати пред пратениците од Лабуристичката партија, во обид да ја зајакне поддршката во својата партија, поради последиците од скандалот со Питер Манделсон поврзан со новите откритија за Епстин.

Овој развој на настаните следува по оставката на Морган МекСвини од функцијата шеф на кабинетот на Стармер во неделата.

Според извештаите на локалните медиуми, високи личности се заложија за Стармер, а министерот за труд и пензии Пет Мекфаден ги предупреди пратениците од Лабуристичката партија дека гласачите нема да им простат ако го отстранат Стармер и предизвикаат она што тој го опиша како дестабилизирачка трка за лидерство.

Министерката за претприемништво, бароницата Смит од Малверн, изјави дека е „сигурна“ дека Стармер ќе остане на функцијата.

Во разговор за Би-Би-Си во понеделник, таа рече: „Само да биде јасно, британскиот народ го избра Кир Стармер да ја води оваа влада и го замоли, во петгодишен мандат, да ја промени земјата“.

На прашањето дали разговарала за можноста за оставка со премиерот, бароницата Смит рече дека не разговарала директно со него, додавајќи: „Не верувам дека ќе го стори тоа, не мислам дека треба“.

Дебатата за иднината на Стармер се интензивираше по оставката на шефот на неговиот кабинет, Морган МекСвини, во неделата, во очи на скандалот со Епстин.

Со оглед на тоа што Вестминстер е фокусиран на тоа колку долго може да остане на функцијата по загубата на клучен советник, се прават историски споредби со претходните лидери.

Минатите примери укажуваат дека оставката на виш советник ретко води до моментално соборување на премиерот.

Поранешните британски лидери како Маргарет Тачер, Тони Блер, Гордон Браун, Тераса Меј и Борис Џонсон останаа на функцијата со месеци или години откако ги загубија влијателните помошници.

Во четврток, Стармер изјави дека му е „жал“ што поверувал во „лагите“ на Манделсон и го назначил за амбасадор во САД, бидејќи притисокот врз него продолжи да расте откако призна дека знаел за врските на Манделсон со осудениот сексуален престапник Епстин.

Манделсон беше отпуштен во септември, но новите досиеја на Епстин сугерираат дека тој споделувал доверливи информации со осудениот сексуален престапник кога бил деловен секретар во 2009 година.

Манделсон, исто така, се повлече од Домот на лордовите и од Лабуристичката партија.

Министерството за правда на САД неодамна објави повеќе од 3 милиони страници, 2.000 видеа и 180.000 слики според Законот за транспарентност на досиејата на Епстин, кој беше изгласан во ноември минатата година.

Материјалите вклучуваат фотографии, транскрипти од големата порота и истражни записи, иако многу страници остануваат значително редактирани. Преживеаните жртви на Епштајн и нивните роднини велат дека објавувањето не е во согласност со она што го бара законот и изоставува многу важни информации.

Епстин беше пронајден мртов по самоубиство во затвор во Њујорк во 2019 година, додека чекаше судење по обвиненијата за федерална трговија со малолетни девојчиња и педофилија.