Numri i vdekjeve të konfirmuara gjatë protestave mbarëkombëtare në Iran është rritur në 4.519, njoftoi të martën Human Rights Activists News Agency (HRANA), me seli në ShBA.

Sipas të dhënave të përpiluara nga HRANA, të paktën 26.314 persona janë arrestuar, ndërsa 5.811 të tjerë kanë pësuar lëndime serioze, teksa demonstratat hynë në ditën e tyre të 24-të.

Agjencia bëri të ditur se edhe 9.049 vdekje të tjera janë ende nën hetim.

HRANA theksoi se shifrat janë regjistruar në kushte ndërprerjesh të gjera të internetit, presioni të lartë të sigurisë dhe qasjeje të kufizuar në informacion, duke paralajmëruar se numri real i viktimave mund të jetë dukshëm më i lartë.

Irani është tronditur nga valë protestash që prej muajit të kaluar, të cilat nisën më 28 dhjetor në Pazarin e Madh të Teheranit, për shkak të zhvlerësimit të fortë të rialit iranian dhe përkeqësimit të kushteve ekonomike. Demonstratat më pas u përhapën në disa qytete të tjera.

Zyrtarët kanë akuzuar ShBA-në dhe Izraelin për mbështetjen e asaj që ata e përshkruajnë si “trazira të armatosura”, të cilat kanë kryer disa sulme në vende publike në mbarë vendin.

Presidenti i ShBA-së, Donald Trump, ka kërcënuar vazhdimisht se do të “godiste fort” nëse protestuesit vriteshin, por më pas ka përgëzuar Teheranin për anulimin e raportuar të qindra ekzekutimeve të planifikuara.