Autoriteti i Përgjithshëm i Aviacionit Civil i Emirateve të Bashkuara Arabe (GCAA) njoftoi mbylljen e përkohshme dhe të plotë të hapësirës ajrore të vendit si një “masë të jashtëzakonshme paraprake” për të garantuar sigurinë e fluturimeve, ekuipazheve dhe territorit kombëtar, raportoi agjencia shtetërore e lajmeve WAM.

GCAA-ja tha se vendimi erdhi pas një vlerësimi të thelluar të rreziqeve të sigurisë dhe atyre operacionale, i bërë në koordinim të plotë me autoritetet kombëtare dhe ndërkombëtare, duke theksuar se siguria e hapësirës ajrore dhe mbrojtja e sovranitetit të Emirateve janë “prioritete absolute”.

Autoriteti shtoi se do të vazhdojë të informojë institucionet dhe publikun për çdo zhvillim të ri në kohë reale.

Po ashtu, u bëri thirrje pasagjerëve që të kontrollojnë me kompanitë ajrore për informacionin më të fundit mbi fluturimet, duke theksuar se transportuesit ajrorë, në koordinim me autoritetet lokale, do të ofrojnë akomodim dhe asistencën e nevojshme.

Përshkallëzimi i armiqësive në rajon ka vazhduar që nga 28 shkurti, kur Izraeli dhe ShBA-ja nisën sulme të përbashkëta ndaj Iranit, duke vrarë mbi 1.300 persona deri më tani, përfshirë edhe Udhëheqësin Suprem, Ayatollah Ali Khamenei.

Irani është kundërpërgjigjur me sulme me dronë dhe raketa ndaj Izraelit, Jordanisë, Irakut dhe vendeve të Gjirit që strehojnë baza ushtarake amerikane, duke shkaktuar viktima dhe dëme në infrastrukturë, si dhe duke ndërprerë tregjet globale dhe aviacionin.