Ministri i Jashtëm rus, Sergey Llavrov, deklaroi të hënën se Shtetet e Bashkuara të Amerikës (ShBA) nuk janë më të gatshme të zbatojnë propozimin e tyre për t'i dhënë fund konfliktit në Ukrainë, i cili iu paraqit Rusisë gjatë bisedimeve në nivel presidencial në Anchorage, Alaska, në gusht 2025.
Pavarësisht dialogut dhe marrëveshjeve të arritura në takimin e Anchorage, pala amerikane vazhdon politikën e saj të përmbajtjes dhe presionit ndaj Rusisë, tha Llavrov në një intervistë me kanalin televiziv BRICS.
"Përveç faktit se ata supozohet se propozuan diçka në lidhje me Ukrainën dhe ne ishim gati, dhe tani ata nuk janë gati, ne gjithashtu nuk shohim ndonjë të ardhme të ndritur në sferën ekonomike", tha Llavrov.
Diplomati më i lartë rus tha se Uashingtoni vendosi sanksione ndaj kompanive ruse të naftës Rosneft dhe Lukoil pas asaj që ai e përshkroi si "bisedime konstruktive" dhe akuzoi ShBA-në se po zhvillon një "luftë" kundër cisternave në det të hapur.
Masa të tjera, tha ai, përfshijnë presionin ndaj partnerëve si India për të shmangur blerjen e energjisë ruse, duke pasqyruar presionin e mëparshëm ndaj Evropës, duke e detyruar atë të blejë gaz natyror të lëngshëm amerikan me "çmime të tepruara".
"Evropës i është ndaluar prej kohësh të blejë burime energjie ruse. Me fjalë të tjera, amerikanët kanë deklaruar qëllimin e tyre për dominim ekonomik" shtoi ai.
Llavrov deklaroi se ShBA-ja po e ndjek "qëllimisht" dominimin ekonomik dhe kontrollin mbi rrugët globale të energjisë duke përdorur metoda të papranueshme për Rusinë.
Moska nga ana e saj, po kërkon mënyra për t’i mbrojtur interesat e saj, duke përfshirë krijimin e metodave alternative të pagesës dhe zhvillimin e bashkëpunimit me vendet e tjera.
Ministri Llavrov vuri në dukje më tej se Uashingtoni po përpiqet të kontrollojë lidhjet ushtarako-teknike midis Rusisë dhe aleatëve të saj.
"Ata po përpiqen të kontrollojnë tregtinë tonë, bashkëpunimin e investimeve dhe lidhjet ushtarako-teknike me partnerët më të mëdhenj strategjikë të Rusisë, siç është India dhe anëtarët e tjerë të BRICS-it."
Llavrov deklaroi se Rusia mbetet e hapur për bashkëpunim me ShBA-në, por vetë amerikanët po "krijojnë barriera artificiale".
Duke folur për NATO-n, BE-në dhe Organizatën për Siguri dhe Bashkëpunim në Evropë (OSBE), ai i përshkroi ato si "të vjetruara", duke thënë se ato "u përqendruan kryesisht në zhvillimin e pjesës perëndimore të kontinentit, duke supozuar se janë 'zotërit' e pjesës tjetër".
Llavrov tha se Rusia nuk mbështet shfuqizimin e Fondit Monetar Ndërkombëtar, Bankës Botërore apo Organizatës Botërore të Tregtisë.
Në vend të kësaj, tha ai, Rusia kërkon të sigurojë që vendet e BRICS-it "të marrin vota dhe të drejta në të gjitha këto institucione të Bretton Woods në përputhje me peshën e tyre reale në ekonominë, tregtinë dhe logjistikën globale".
Diplomati shprheu besimin se aleanca BRICS mund të lehtësojë harmonizimin e planeve të zhvillimit në nivel global. "BRICS-i ofron një kornizë, një 'ombrellë', nëse do ta quani kështu, për zhvillimin e proceseve të integrimit në kontinente individuale", tha ai.
Lidhur me sigurinë, Llavrov theksoi nevojën e Rusisë për të siguruar me besueshmëri sigurinë e saj mes kërcënimeve në Evropë, ku politikanët flasin hapur për luftë me Moskën.
Ministri Llavrov paralajmëroi se Rusia nuk do të lejojë vendosjen e asnjë arme në territorin ukrainas që kërcënon interesat e sigurisë ruse.
Blloku ekonomik BRICS synon të krijojë mekanizma të pavarur, jo për të synuar ShBA-në, por për t’i kundërshtuar përpjekjet e saj për të vënë nën kontroll gjithë botën dhe për të kërkuar lëshime të njëanshme, tha ai.
