Marrëveshja e armëpushimit në Gaza përbën një hap të rëndësishëm drejt vendosjes së paqes së qëndrueshme në rajon, tha të enjten Ministria turke e Mbrojtjes Kombëtare.

“Shpresojmë që ky zhvillim të jetë fillimi i një paqeje gjithëpërfshirëse, të drejtë dhe të qëndrueshme dhe të kontribuojë në arritjen e qëllimit për një zgjidhje me dy shtete”, tha zëdhënësi i ministrisë, Zeki Akturk, në një konferencë javore për shtyp në Ankara.

Ndërkohë, në përgjigje të një pyetjeje lidhur me pjesëmarrjen e Türkiyes në forcën e misionit për Gazën, burime të ministrisë theksuan se “me përvojën e fituar nga misionet e mëparshme të paqes, Forcat e Armatosura Turke janë të gatshme të marrin përsipër çdo detyrë që mund t’u caktohet në kuadër të ligjit ndërkombëtar për vendosjen dhe ruajtjen e paqes, dhe puna po zhvillohet në bashkëpunim me institucionet përkatëse shtetërore.”

Türkiye mbetet e përkushtuar ndaj parimit të një shteti dhe një ushtrie në Siri

Lidhur me integrimin e Forcave Demokratike Siriane (SDF) në ushtrinë siriane, burimet thanë se “qeveria siriane po vazhdon përpjekjet e saj për ristrukturimin e të gjitha institucioneve dhe organeve të saj, si dhe për vendosjen e stabilitetit dhe sigurisë në vend. Në këtë kontekst, ne po vazhdojmë përpjekjet për të forcuar koordinimin dhe bashkëpunimin me Ministrinë Siriane të Mbrojtjes, me synim rritjen e kapaciteteve të sigurisë së Sirisë dhe kontributin në vendosjen e stabilitetit dhe sigurisë në rajon duke e pastruar atë nga terrorizmi.”

“Në përputhje me qëllimin për stabilitet dhe siguri në Siri, ne mbetemi të përkushtuar ndaj parimit të një shteti dhe një ushtrie. Në këtë drejtim, integrimi i organizatës terroriste SDF në ushtrinë siriane ka rëndësi thelbësore. Si Türkiye, ne po zhvillojmë koordinimin e nevojshëm me homologët tanë për këtë çështje dhe po e ndjekim nga afër procesin”, shtuan burimet.