Gjatë vizitës së parë zyrtare të kryeministrit të Luksemburgut, Luc Frieden, në Mal të Zi, presidenti Jakov Milatoviq deklaroi se Mali i Zi ka potencial të përsërisë modelin e suksesit luksemburgas, ndërsa Frieden theksoi se vendi i tij do të vazhdojë të mbështesë fuqishëm rrugën evropiane të Malit të Zi.
“Luksemburgu ka treguar se si me një vizion të qartë dhe institucione të forta një shtet mund të shndërrohet në një histori të madhe evropiane suksesi”, tha Milatoviq, duke theksuar se “Mali i Zi ka potencial të ngjashëm, me një sipërfaqe pesë herë më të madhe dhe me synimin e qartë për t’u bërë anëtare e Bashkimit Evropian.”
“Partnerët tanë më të afërt e shohin këtë dhe e mbështesin hapur”, shtoi ai.
Vizita e Frieden filloi me një darkë pune në vilën “Gorica” së bashku me Milatoviqin. Ky takim në nivel të lartë konfirmoi partneritetin e fortë dhe marrëdhëniet shumë të ngushta mes dy shteteve, të bazuara në besim, vlera të përbashkëta dhe perspektivën e qartë evropiane të Malit të Zi.
Gjatë bisedës së hapur dhe përmbajtësore, u diskutuan mundësitë për forcimin e mëtejshëm të dialogut politik, thellimin e bashkëpunimit ekonomik dhe përshpejtimin e integrimit evropian të Malit të Zi.
Frieden theksoi se Luksemburgu e sheh Malin e Zi si një partner serioz në rrugën drejt BE-së.
“Luksemburgu do të vazhdojë të mbështesë fuqishëm rrugën e Malit të Zi drejt Bashkimit Evropian dhe të forcojë bashkëpunimin e bazuar në parime të përbashkëta dhe miqësi,” tha ai.
Milatoviq nënvizoi se diaspora malazeze në Luksemburg përfaqëson një urë besimi, miqësie dhe bashkëpunimi, por njëkohësisht edhe një mundësi të rëndësishme për zhvillimin e Malit të Zi.
U shqyrtuan gjithashtu mundësitë për intensifikimin e bashkëpunimit ekonomik dhe u theksua se ekziston hapësirë e dukshme për rritjen e pranisë së kompanive luksemburgase në Mal të Zi, duke theksuar se një Mal i Zi i qëndrueshëm, i orientuar drejt Evropës dhe ekonomikisht i hapur mund të jetë destinacion i sigurt për investime të reja.
Milatoviq shprehu bindjen se Luksemburgu do të vazhdojë të ofrojë mbështetje të fortë për Malin e Zi në përmbushjen e detyrimeve përfundimtare të agjendës evropiane, veçanërisht në fushat e sundimit të ligjit dhe menaxhimit ekonomik. U theksua se intensifikimi i bashkëpunimit teknik dhe ekspertizës do të përshpejtonte edhe më tej procesin e reformave dhe përgatitjen e vendit për anëtarësim të plotë në BE.
Gjatë takimit u konfirmua gjithashtu se aleanca e ngushtë brenda NATO-s dhe shkalla e lartë e përputhjes së politikës së jashtme midis Malit të Zi dhe Luksemburgut përbëjnë një sinjal të qartë të përkushtimit të përbashkët ndaj stabilitetit, paqes dhe sigurisë së Evropës.
Vizita e parë zyrtare e kryeministrit Frieden në Malin e Zi përfaqëson një hap të rëndësishëm në forcimin e marrëdhënieve të përgjithshme mes dy vendeve mike dhe një tjetër konfirmim se Mali i Zi ka partnerë të fortë që besojnë në potencialin e tij për t’u bërë historia e radhës e suksesit evropian.
