Ministri i Jashtëm i Italisë, Antonio Tajani, tha të mërkurën se ambasada dhe konsullata italiane në Tel Aviv po e monitorojnë nga mëngjesi herët bllokimin nga marina izraelite të një flotiljeje të re që kishte si destinacion Gazën.
“Rreth dhjetë italianë janë ndaluar. Atyre do t’u ofrohet e gjithë ndihma e nevojshme konsullore, së bashku me një kërkesë drejtuar qeverisë izraelite për të siguruar respektimin e të drejtave individuale deri në momentin e dëbimit,” shkroi Tajani në rrjetin social amerikan X.
“Njësia e krizës e Ministrisë së Jashtme (Farnesina) është gjithashtu në veprim,” shtoi ai.
Sipas nismës humanitare, marina izraelite sulmoi të nëntë anijet e koalicionit Freedom Flotilla Coalition (FFC), të quajtura "Thousand Madleens to Gaza", të mërkurën herët në në mëngjes, në ujëra ndërkombëtare, rreth 120 milje detare (222 kilometra) larg nga enklava.
Anijet e flotiljes transportonin ndihma me vlerë mbi 110.000 dollarë amerikanë, duke përfshirë ilaçe, pajisje respiratore dhe ushqime mjekësore për spitalet e Gazës.
Rreth 100 persona ishin në bord, me synimin për të sfiduar bllokadën izraelite mbi Gazën.
Ministria e Jashtme e Izraelit tha se pasagjerët janë transferuar në një port izraelit dhe pritet të deportohen “menjëherë.”
Koalicioni FFC, i themeluar në vitin 2010, ka nisur dhjetëra misione me qëllim dërgimin e ndihmave dhe tërheqjen e vëmendjes ndërkombëtare ndaj krizës humanitare në Rripin e Gazës të rrethuar nga Izraeli.
Flotilja më e fundit u nis pasi forcat detare izraelite sulmuan dhe sekuestruan më shumë se 40 anije që lundronin drejt Gazës javën e kaluar për të sfiduar bllokadën izraelite, duke ndaluar mbi 450 aktivistë që ndodheshin në bord.
Izraeli ka mbajtur një bllokadë mbi Gazën, e cila është shtëpi për gati 2.4 milionë banorë, për gati 18 vjet, dhe e ka ashpërsuar edhe më tej në muajin mars kur mbylli pikat kufitare dhe ndaloi hyrjen e ushqimeve dhe ilaçeve, duke e çuar enklavën drejt urisë masive.
Që nga tetori 2023, bombardimet izraelite kanë vrarë mbi 67.000 palestinezë në enklavë, shumica gra dhe fëmijë, duke e bërë atë të pabanueshme.
