Drejtori i Qendrës Kombëtare të Kundërterrorizmit të ShBA-së, Joseph Kent, ka dhënë dorëheqje, duke përmendur kundërshtimin e tij ndaj luftës së vazhdueshme amerikane në Iran. 

“Nuk mundem, me ndërgjegje të pastër, ta mbështes luftën e vazhdueshme në Iran”, shkroi Kent në një letër të shpërndarë në rrjetin social amerikan X.

Ai argumentoi se Irani nuk përbënte një kërcënim të menjëhershëm për ShBA-në dhe pretendoi se konflikti ishte nisur nën presion të jashtëm.

Kent, një veteran që tha se është dislokuar 11 herë në zona lufte, përmendi gjithashtu një humbje personale, duke e përshkruar veten si “bashkëshort i një heroi të rënë”, pasi bashkëshortja e tij u vra në një luftë të mëparshme.

“Nuk mund të mbështes dërgimin e brezit të ardhshëm për të luftuar dhe vdekur në një luftë që nuk i shërben interesit të popullit amerikan dhe nuk justifikon koston e jetëve amerikane”, shkroi ai.

Ai gjithashtu kritikoi zyrtarë izraelitë dhe disa figura të mediave amerikane, duke i akuzuar se kanë mashtruar administratën dhe duke bërë paralele me luftën në Irak.

“E njëjta taktikë që izraelitët përdorën për të na tërhequr në luftën katastrofike në Irak, që i kushtoi vendit tonë jetën e mijëra burrave dhe grave më të mirë. Nuk mund ta bëjmë këtë gabim përsëri”, shtoi ai.

Duke iu drejtuar drejtpërdrejtë presidentit amerikan, Donald Trump, Kent i bëri thirrje ta ndryshojë kursin.

“Ju mund të ndryshoni drejtim dhe të përcaktoni një rrugë të re për vendin tonë, ose mund të lejoni që të rrëshqasim më tej drejt rënies dhe kaosit”, tha ai, duke shtuar se” ju i keni kartat në dorë”.