YouTube ka fshirë në heshtje më shumë se 700 video dhe ka mbyllur llogaritë e tri organizatave kryesore palestineze për të drejtat e njeriut, sipas një raporti të publikuar të martën nga The Intercept.
Llogaritë e fshira i përkisnin Al-Haq, Al Mezan Center for Human Rights dhe Palestinian Centre for Human Rights, të cilat kishin publikuar pamje të shumta që dokumentonin shkelje të ligjit ndërkombëtar nga Izraeli në Gazë dhe Bregun Perëndimor të pushtuar.
Sipas The Intercept, përmbajtjet e fshira përfshinin hetimet mbi sulmet izraelite, dëshmitë e të mbijetuarve dhe dokumentime të vrasjes së gazetares palestinezo-amerikane Shireen Abu Akleh.
Fshirjet ndodhën në fillim të tetorit, menjëherë pasi qeveria amerikane vendosi sanksione ndaj këtyre grupeve për bashkëpunimin e tyre me Gjykatën Ndërkombëtare Penale (GjNP).
YouTube konfirmoi se mbylljet e llogarive u kryen pas një rishikimi të nxitur nga sanksionet amerikane, duke deklaruar se platforma ka detyrim të përmbahet ligjeve për tregtinë dhe sanksionet.
Aktivistët për të drejtat e njeriut dhe grupet palestineze e kanë quajtur këtë një përpjekje për të heshtur zërat palestinezë dhe për të zhdukur prova të rëndësishme, duke theksuar se organizatat nuk u paralajmëruan paraprakisht dhe se YouTube u fokusua në raportimet për abuzime të të drejtave të njeriut, jo në përmbajtje ekstremiste.
Në dhjetor 2023, Afrika e Jugut ngriti një padi kundër Izraelit në Gjykatën Ndërkombëtare të Drejtësisë (GjND), duke e akuzuar për akte gjenocidale në Gaza. Më pas, disa vende të tjera iu bashkuan çështjes, përfshirë Spanjën, Irlandën, Libinë, Meksikën, Belgjikën dhe Türkiyen. GjND-ja ka lëshuar tri masa të përkohshme, duke urdhëruar Izraelin të parandalojë aktet gjenocidale dhe të lejojë ndihmën humanitare në Gaza.
Sipas të dhënave, Izraeli ka vrarë gati 69.000 persona, kryesisht gra dhe fëmijë, dhe ka plagosur mbi 170.000 të tjerë në sulmet ndaj Gazës që nga tetori 2023.
Një armëpushim midis Izraelit dhe Hamasit u arrit më 10 tetor, mbi bazën e një plani paqeje me 20 pika të propozuar nga presidenti amerikan Donald Trump, por Izraeli e ka shkelur armëpushimin disa herë.
