Sigurimi i paqes së qëndrueshme për palestinezët është fillimisht detyrë e botës islame ndaj Gazës, më pas edhe e komunitetit global, tha të mërkurën presidenti Recep Tayyip Erdoğan gjatë hapjes së vitit të ri legjislativ të parlamentit turk.

Erdoğan theksoi se parlamenti ka “kaluar testin e Gazës me krenari”, duke shtuar se e ka bërë këtë “në një mënyrë të denjë për historinë dhe karakterin tonë kombëtar”.

Ai tha se përgjigjja më e fuqishme ndaj veprimeve të vazhdueshme të Izraelit në Gaza ka ardhur nga salla e parlamentit, duke nënvizuar qëndrimin e zëshëm të Türkiyes për krizën humanitare.

Presidenti u zotua se Türkiye do ta vazhdojë betejën e saj deri në themelimin e një shteti sovran palestinez me kryeqytet Jerusalemin Lindor, brenda kufijve të vitit 1967.

Deklaratat e Erdoğanit erdhën vetëm disa ditë pasi presidenti amerikan Donald Trump shpalli një plan me 20 pika për t’i dhënë fund luftës së Izraelit në Gaza. 

Plani parashikon shkëmbimin e të burgosurve, çarmatosjen e plotë të Hamasit, një tërheqje graduale të forcave izraelite dhe krijimin e një komiteti palestinez teknokratik, jopolitik për ta qeverisur enklavën. Në plan përfshihet edhe një rrugë drejt vetëvendosjes dhe shtetësisë palestineze, por jo si garanci.

Gaza

“Gaza ka pasur mjaft gjak, lot dhe shkatërrim. Ky turp duhet të marrë fund menjëherë,” tha Erdoğan, duke bërë thirrje për një ndalim të menjëhershëm të dhunës në enklavën e rrethuar.

Presidenti shtoi më tej se qëndrimi i vendosur i Türkiye-s ndaj Gazës do ta bëjë vendin “një fener moral të kohës së vet”, duke lënë një gjurmë të përhershme në histori.

Ai lavdëroi popullin palestinez, duke thënë: “Vëllezërit dhe motrat tona në Gaza janë dëshmitarët më të afërt të përpjekjeve të Türkiye-s” dhe “e dinë shumë mirë çfarë kemi bërë.”

“Ne kurrë nuk i braktisëm bijtë e guximshëm të Gazës që rezistuan heroikisht forcave pushtuese që sulmuan tokën e tyre me armët më moderne të botës,” shtoi ai.

Presidenti gjithashtu ripërtëriu angazhimin e Türkiyes për të mbrojtur të drejtat palestineze dhe Jerusalemin, duke thënë se vendi do të vazhdojë këto përpjekje deri në “frymën e fundit.”

Duke cituar një slogan për një Palestinë të lirë, ai shprehu gjithashtu shpresën për një të ardhme paqeje dhe sigurie, duke thënë: “Sinqerisht shpresoj që do të shohim ditë të bukura kur paqja, qetësia dhe siguria do të mbizotërojnë, nga lumi deri në det.”

Siria

Duke iu kthyer Sirisë, Erdoğan tha: “Ne gjithmonë kemi mbështetur integritetin territorial të Sirisë dhe vazhdojmë të kundërshtojmë fuqishëm çdo plan për ndarjen e vendit.”

Ai paralajmëroi se nëse përpjekjet diplomatike dështojnë, Türkiye nuk do ta lejojë përsëritjen e ngjarjeve të kaluara në Siri.

Bashar Assad, udhëheqësi i Sirisë për gati 25 vjet, u arratis në Rusi dhjetorin e kaluar, duke i dhënë fund regjimit të Partisë Baath, që kishte qenë në pushtet që nga viti 1963. Një administratë e re tranzitore e drejtuar nga Ahmad al-Sharaa u formua në janar.