Данска е „подготвена да направи повеќе“, а САД веќе имаат широк воен пристап до Гренланд и би можеле да побараат зголемување на своето воено присуство, а секое такво барање ќе биде конструктивно разгледано, изјави вчера данскиот министер за надворешни работи Ларс Локе Расмусен.
На прес-конференцијата одржана во присуство на министерката за надворешни работи на Гренланд, Вивијан Мотцфелд, во данската амбасада во Вашингтон, Расмусен рече дека средбата со потпретседателот на САД, Џ.Д. Венс, и државниот секретар на САД, Марко Рубио, следела по серија впечатливи јавни изјави за Гренланд.
Како што истакна Расмусен, Гренланд е опфатен со Член 5 од НАТО, кој ја дефинира колективната одбрана кога е нападната која било членка на Алијансата.
Тој додаде дека целта на средбата била да се најде заеднички начин за зајакнување на безбедноста на Арктикот.
Расмусен го опиша разговорот со високи американски претставници како „искрен, но конструктивен“.
Тој изјави дека разговарале „како да се обезбеди долгорочна безбедност во Гренланд“, објави Гардијан.
Расмунсен, исто така, рече дека позициите „сè уште се разликуваат“, дека американскиот претседател Доналд Трамп „јасно го искажал својот став“ и дека Данска и Гренланд „имаат различен став“.
Според него, Данска „сè уште верува дека долгорочната безбедност на Гренланд може да се обезбеди во рамките на сегашните рамки“.
Тој додаде дека Данска и Гренланд сметаат дека „секоја идеја што не би го почитувала територијалниот интегритет на Данска и правото на самоопределување на гренландскиот народ“ е целосно неприфатлива.
„Значи, сè уште имаме фундаментално несогласување, но исто така се согласуваме дека не се согласуваме“, рече Расмусен.
Тој, исто така, изјави дека ќе биде формирана работна група на високо ниво за да испита дали овие две позиции можат да се усогласат.
Данскиот министер рече дека групата ќе се фокусира на безбедносните загрижености на САД на Арктикот, почитувајќи ги црвените линии на Данска, и дека ќе се состане за прв пат „за неколку недели“.
