Американскиот државен секретар Антони Блинкен пристигна во ненајавена посета на Киев, каде се очекува да објави повеќе од милијарда долари свежа помош за Украина.

„Очекуваме секретарот да објави повеќе од милијарда долари ново американско финансирање за Украина за време на оваа посета“, рече висок претставник на американскиот Стејт департмент на пат за Киев. Стејт департментот соопшти дека Блинкен пристигнал во главниот град на Украина и бил пречекан од американската амбасадорка Бриџит Бринк.

Блинкен се очекува да се сретне со претседателот Володимир Зеленски, премиерот Денис Шмихал и министерот за надворешни работи Дмитро Кулеба за да разговараат за тековната контраофанзива на украинската армија и напорите за реконструкција на земјата.

Официјални претставници на Вашингтон рекоа дека можните алтернативни патишта за извоз на украинското жито, исто така, ќе бидат разгледани по излегувањето на Русија од Иницијативата за жито во Црното Море и нејзиното често бомбардирање на пристанишните објекти во регионот Одеса, од каде што повеќето жито се транспортираат во странство.

Инаку, ова е четвртата посета на Блинкен на Киев од почетокот на војната во Украина.