Претседателот на Украина, Володимир Зеленски, изјави дека Украина е подготвена да разговара за мир врз основа на принципот „да стоиме таму каде што стоиме“, односно разграничување по линијата на фронтот, но дека нема да прифати руски „ултиматуми“ што подразбираат понатамошна окупација на територијата.

Во интервју за „Кјодо њуз“, Зеленски изјави дека компромисите се можни, но не по цена на независноста и суверенитетот на Украина.

Тој истакна дека Русија е „агресор“ и дека, како што рече, многу земји го признале тоа.

„Подготвени сме да разговараме за компромиси со Соединетите Американски Држави. Но, да не добиваме ултиматуми од Русите одново и одново. Тие се агресорот. Сите го признаа тоа. Тоа не се променило. Многу земји што беа посредници или се обидоа да бидат посредници од самиот почеток на оваа војна, особено на Блискиот Исток и Азија, како и други земји - сите признаваат дека Русија е агресор“, рече Зеленски.

Според него, фактот дека Русија окупирала речиси 20 проценти од украинската територија и дека тоа што Киев е подготвен да разговара за мир врз основа на постојните фронтовски линии, претставува „голем компромис“.

Тој ги оцени руските барања како ултиматум.

„Ова е тероризам. Дури и самите овие зборови се тероризам. „Подготвен сум да не ве убијам - дајте ни сè“, што значи ова? Ова не е компромис. Ова е ултиматум“, нагласи Зеленски.

Зеленски додаде дека по разговорите во Женева е постигнат напредок во воените прашања, вклучително и следењето на прекинот на огнот, додека ставовите на страните за политичките прашања, териториите и другите чувствителни теми остануваат различни.