Дваесетгодишник од Мала Речица бил уапсен поради закани за тероризам преку социјалната апликација Дискорд, соопшти Основното јавно обвинителство за гонење на организиран криминал и корупција.
Јавен обвинител од ОЈО ГОКК донесе наредба за спроведување на истражна постапка против дваесетгодишен жител на Мала Речица за сторено кривично дело Тероризам.
„Осомничениот на крајот на месец јануари годинава преку социјалната апликација Дискорд испратил сериозна закана дека е подготвен да изврши напад со огнено оружје - автоматска пушка АК-47 позната како Калашников, притоа појаснувајќи дека истиот е со нарушено психичко здравје. Инспирација за ваков напад, му бил настан од 14.12.2012 година во САД кога Адам Ланза, дваесетгодишно момче, во Училиште во САД со автоматка пушка убило 26 лица од кои 20 деца. По добиени информации од Амбасадата на САД во Скопје дека од страна на ФБИ е поднесено барање за итно откривање на Дискорд профилот што се наоѓа во нашата земја, а од каде што се упатени сериозните закани, МВР во координација со ОЈО ГОКК презедоа дејствија за откривање на сторителот“, рекоа од ОЈОГОКК.
По идентификација и лоцирање на корисничката адреса на 17.2.2026 година под раководство на јавен обвинител од ОЈО ГОКК, полициски службеници од Одделот за сузбивање на организиран и сериозен криминал и асистенција на САЕ Тигар извршиле претрес на домот на осомничениот во Мала Речица.
„При претресот кај осомничениот се пронајдени и одземени секира, пет ножа со различна должина, телескоп, седум Ајфон мобилни телефони и компјутер. Исто така, од таткото на осомничениот е одземен пиштол за кој поседува дозвола и повеќе парчиња муниција. Останатото пронајдено оружје- пиштол и автоматска пушка, дедото на осомничениот ги поседувал без дозвола и за него е поднесена кривична пријава до ОЈО Тетово за кривично дело Недозволено изработување, држење, посредување и тргување со оружје или распрскувачки материи“, соопшти обвинителството.
Јавниот обвинител до судијата на претходна постапка при Основниот суд Скопје достави предлог за определување на мерка притвор против осомничениот. Предлогот е прифатен и со Решение мерката е определена во траење од 30 дена.
