Денеска во Ирак започна гласањето на парламентарните избори што ќе ја обликуваат политичката сцена во земјата во следните четири години.

Околу 21 милион гласачи имаат право да гласаат за да изберат членови на парламентот со 329 места, кој ќе го избере претседателот и ќе ѝ даде доверба на владата.

Избирачките места ќе се затворат во 18 часот по локално време (15:00 GMT).

Резултатите од изборите треба да бидат објавени во рок од 24 часа од гласањето, а официјално ќе бидат потврдени откако ќе бидат разгледани жалбите.

Премиерот Мохамед Шиа ал-Судани рече дека изборите се одржуваат „во безбедна и стабилна атмосфера“.

„Изборите го потврдуваат принципот на мирен трансфер на власта, а владата посвети големо внимание на тоа“, изјави Судани на прес-конференција откако гласаше на гласачко место во главниот град Багдад.

Последните парламентарни избори во Ирак се одржаа на 10 октомври 2021 година, две години откако раширените протести го принудија поранешниот премиер Адил Абдул-Махди да поднесе оставка. Мустафа Ал-Кадими го наследи и ги надгледуваше изборите.

Сегашниот парламент, во кој доминираат шиитските партии и блокови, го започна својот мандат на 9 јануари 2022 година, со времетраење од четири години, што завршува на 8 јануари 2026 година.

Според ирачкиот закон, парламентарните избори мора да се одржат најмалку 45 дена пред крајот на мандатот на парламентот.

Трите гранки на власт во Ирак традиционално се поделени по секти: претседателската функција им припаѓа на Курдите, премиерската функција на шиитите, а претседателот на парламентот на сунитите, со што се обезбедува застапеност на сите сегменти од општеството во владата.