Украина во вторник ќе сподели со САД ревидиран мировен план насочен кон завршување на војната со Русија, по разговорите во Лондон меѓу претседателот Володимир Зеленски и лидерите на Франција, Германија и Велика Британија.

Украина се обидува да го избалансира американскиот нацрт-мировен договор, кој се смета за поповолен за Москва, додека Белата куќа врши притисок Киев брзо да се согласи на договор. На вонредниот состанок во Лондон - на кој присуствуваа Кир Стармер, Емануел Макрон, Фридрих Мерц и Володимир Зеленски - целта беше да се зајакне позицијата на Украина.

Зеленски рече дека ревидираниот план има 20 точки, но дека нема договор за територијата, бидејќи Москва бара отстапки, а Украина не се согласува да се откаже од ниту еден дел од својата територија.

По Лондон, Зеленски отпатува во Брисел, каде што се согласи со лидерите на ЕУ и НАТО дека секој мир мора да го почитува украинскиот суверенитет и да гарантира долгорочна безбедност. Лидерите разговараа и за користењето на замрзнатите руски средства за финансирање на Украина, додека европските земји бараат побрз договор за ова прашање.

Стармер, Макрон, Мерц и Зеленски, исто така, сакаат јасни американски безбедносни гаранции против идна руска агресија.

Рускиот генерал Валериј Герасимов, пак, во вторник рече дека руските сили напредуваат по целата линија на фронтот во Украина и ги напаѓаат опкружените украински сили во градот Мирноград.

На состанокот на командниот пункт со офицерите на Групата Центар, која се бори во украинскиот регион Днепропетровск, Герасимов рече дека претседателот Владимир Путин наредил пораз на украинските сили во Мирноград, град со предвоено население од околу 46.000 источно од Покровск.

Русија ја презеде контролата врз повеќе од 30% од зградите во Мирноград, рече Герасимов. Русија, која го користи советското име Красноармејск за соседниот Покровск, вели дека го освоила целиот град и тврди дека ги опколила и украинските сили во Мирноград, кој Русите го нарекуваат Димитров.

Украина постојано ги негира руските тврдења дека Покровск паднал и вели дека нејзините сили сè уште држат дел од градот и се борат во Мирноград.

Русија моментално контролира 19,2% од Украина, вклучувајќи го Крим, кој го анектираше во 2014 година, Луганск, повеќе од 80% од Донецк, околу 75% од Херсон и Запорожје, и делови од регионите Харков, Суми, Николаев и Дњепропетровск.

Украина тврди дека ги држи своите одбранбени линии и ја принудува Русија да плати висока цена за она што го нарекува релативно скромни добивки.