Ministria e Mbrojtjes Kombëtare e Meksikës njoftoi se kreu i Kartelit Jalisco Nueva Generación (CJNG) dhe një nga baronët më të kërkuar të drogës në vend, El Mencho, u plagos rëndë gjatë një operacioni në shtetin Jalisco dhe vdiq gjatë transportimit për në Mexico City.

Ministria konfirmoi se El Mencho u neutralizua gjatë një operacioni ushtarak me saktësi të lartë në Tapalpa, në shtetin Jalisco.

Në deklaratë thuhet: “Qëllimi i operacionit ishte kapja e El Mencho-s i gjallë, por ai, i plagosur rëndë në përplasje, ndërroi jetë gjatë transportimit ajror për në Mexico City. Do të kryhen autopsi dhe ekzaminime mjeko-ligjore për identifikimin zyrtar.”

Gjatë përleshjes u vranë 4 anëtarë të kartelit dhe 2 të tjerë u arrestuan. “Fatkeqësisht, gjatë këtij operacioni ushtarak u plagosën edhe 3 pjesëtarë të personelit. Ushtarët e plagosur u dërguan në institucione shëndetësore në Mexico City për trajtim urgjent,” thuhet në deklaratë.

Sipas mediave meksikane, gjatë operacionit – i cili u mbështet edhe nga inteligjenca amerikane – shpërtheu përplasje e armatosur pasi personeli ushtarak u sulmua nga anëtarë të organizatës kriminale.

Gjatë kontrolleve në zonë, forcat federale sekuestruan një arsenal me fuqi të lartë zjarri që përfshinte automjete të blinduara dhe armë të rënda të ndryshme.

Mes pajisjeve të konfiskuara kishte edhe raketahedhës me kapacitete teknike për të shkatërruar automjete të blinduara dhe për të rrëzuar mjete ajrore.

Ndërkohë, për shkak të valës së dhunës së shkaktuar nga anëtarët e kartelit, njësi të ushtrisë u dislokuan në shumë shtete, veçanërisht në Jalisco.

Pas operacionit, si hakmarrje e mundshme e organizatës kriminale, në Jalisco dhe në disa shtete të tjera të vendit u regjistruan bllokime të shumta rrugësh, si dhe zjarrvënie ndaj automjeteve dhe bizneseve.

Valë e gjerë dhune vazhdon të përhapet dhe të intensifikohet në shumë shtete të Meksikës.