Epoka e terrorizmit në rajon ka përfunduar, tha të hënën presidenti turk, duke theksuar se kushtet e armëpushimit të ri dhe marrëveshjet për integrim të plotë në Siri duhet të zbatohen dhe se duhen shmangur llogaritjet e gabuara.

Sirianët duken të kënaqur me marrëveshjen e së dielës, përveç një grushti përfaqësuesish që kërkojnë të krijojnë një “shtet brenda shtetit”, tha Recep Tayyip Erdoğan pas një mbledhjeje të kabinetit në kryeqytetin Ankara.

Erdoğan tha se i ka përcjellë presidentit sirian Ahmad al-Sharaa se Ankaraja do të vazhdojë të qëndrojë pranë Damaskut në luftën kundër terrorizmit, duke shtuar: “Ne nuk do ta braktisim popullin sirian”.

Türkiye beson se një Siri e bashkuar dhe me integritet territorial është jetike për prosperitetin rajonal, theksoi ai, duke shtuar: “Siria u përket sirianëve”.

Ankaraja është një vëlla, një fqinj dhe një mik për popullin sirian në kohë nevoje, shtoi Erdoğan, duke vënë në dukje se Siria u përket të gjithë sirianëve, në të gjitha grupet e tyre fetare dhe etnike, përfshirë arabët, turkmenët, kurdët, alevitët, sunitët dhe druzët.

“Për të siguruar që vuajtjet e përjetuara një shekull më parë të mos përsëriten, ne nuk do të biem në kurthet e vendosura përpara nesh dhe nuk do t’u nënshtrohemi provokimeve”, theksoi ai.

Të dielën në mbrëmje, al-Sharaa njoftoi një armëpushim dhe një marrëveshje për integrimin e plotë të grupit terrorist YPG/SDF në institucionet shtetërore.

Njoftimi pasoi një operacion të Ushtrisë Siriane, e cila rimori zona të gjera në lindje dhe verilindje të Sirisë, pas shkeljeve të përsëritura nga SDF-ja të marrëveshjeve të nënshkruara me Damaskun gati një vit më parë.