Presidenti i Türkiyes, Recep Tayyip Erdoğan, theksoi hapat e sigurisë ndërkufitare, përparimin drejt integrimit në Sirinë veriore dhe zhvillimet në kapacitetet mbrojtëse.

Türkiye ndërmerr të gjitha hapat e nevojshëm për sigurinë e saj përtej kufijve, duke neutralizuar kërcënimet në burim pa kërkuar leje nga askush, deklaroi të enjten presidenti i Türkiyes, Recep Tayyip Erdoğan.

Duke folur në një program iftari me familjet e dëshmorëve në Rezidencën Çankaya në kryeqytetin Ankara, Erdoğan tha se është bërë përparim i rëndësishëm në përpjekjet drejt një “Türkiye pa terrorizëm”.

“Ka pasur një rënie serioze të rreziqeve të sigurisë të drejtuara ndaj vendit tonë, si brenda ashtu edhe përtej kufijve tanë”, tha ai.

Duke iu referuar terrorizmit, Erdoğan theksoi: “Jemi të vendosur ta çlirojmë përgjithmonë Türkiyen nga kjo plagë që ka djegur zemrat e kombit tonë për gati gjysmë shekulli”.

Ai vuri në dukje se falë operacioneve të forcave të armatosura dhe njësive të tjera të sigurisë, “kemi kufizuar ndjeshëm lëvizshmërinë e organizatave terroriste”.

“Sot, pothuajse në çdo fushë, përfshirë mjetet ajrore pa pilot, mjetet ajrore të armatosura pa pilot, raketat, anijet, helikopterët dhe tanket, ne mund t’i përmbushim pothuajse të gjitha nevojat tona vetë”, tha Erdoğan.

Ai shtoi gjithashtu se muajin e kaluar është arritur një marrëveshje për zgjidhjen e çështjes në Sirinë veriore pa gjakderdhje, duke theksuar se “ka nisur procesi drejt integrimit të plotë”.