Ministria e Zhvillimit Rajonal dhe e Infrastrukturës e Bullgarisë njoftoi se Bullgaria dhe Rumania kanë zhvilluar një projekt të përbashkët bazuar në inteligjencë artificiale për të vëzhguar dhe kontrolluar ndotjen e ujit në lumin Danub. 

Sipas deklaratës së ministrisë, për ta përmirësuar sigurinë e lundrimit dhe kontrollin përgjatë pjesës së rëndësishme të lumit që formon kufirin e përbashkët mes dy vendeve, do të investohen rreth 4 milionë euro.

Do të krijohet një sistem modern transkufitar për ta monitoruar ndotjen e ujit të shkaktuar nga lundrimi i anijeve në lumin Danub.

Nisma e përbashkët e përshkruar si "Forcimi i kontrolleve në lumin Danub përmes inteligjencës artificiale dhe integrimit të të dhënave", do të zbatohet nga Agjencia Ekzekutive e Administratës Detare Bullgare në bashkëpunim me Administratën Detare të Rumanisë.

Financimi i projektit do të sigurohet nga "Programi Interreg VI-A Rumani - Bullgari", i menaxhuar nga Ministria e Zhvillimit Rajonal dhe e Infrastrukturës e Bullgarisë.

Në sistemin e ri do të përdoren mjete inovative të inteligjencës artificiale për mbledhjen dhe analizimin e të dhënave mbi ndotjen e lumit. Në rast aksidenti, do të zbatohet gjithashtu një procedurë për monitorim dhe ndërhyrje të përbashkët.

"Zbatimi i projektit do të kontribuojë në përmirësimin e ndjeshëm të cilësisë dhe qëndrueshmërisë së kontrolleve të anijeve, një lundrim më të sigurt, uljen e ndikimeve mbi mjedisin dhe sigurimin e transportit në lumin Danub në kushte më të barabarta", thuhet në deklaratë.