Droni i ri luftarak Bayraktar TB3 i kompanisë turke Baykar dhe anija pa ekuipazh kamikaze Albatros-S e kompanisë ASELSAN realizuan një operacion të suksesshëm të përbashkët, duke demonstruar aftësinë për veprim të koordinuar, njoftuan kompanitë të enjten.

“Bayraktar TB3, i nisur nga TCG Anadolu, mundësoi komandimin dhe kontrollin e anijes kamikaze Albatros-S në distanca të mëdha”, publikoi ASELSAN në rrjetin turk NSosyal.

Kompanitë theksuan se, falë zgjerimit të ndjeshëm të distancës së komandimit dhe kontrollit që sjell Bayraktar TB3, anijet kamikaze Albatros-S do të bëhen “faktor kyç në det.”

“Në këtë hap të madh morën pjesë edhe përfaqësues të lartë ushtarakë të huaj nga shumë vende”, shtohet në njoftim.

Delegacione ushtarake nga Italia, Mbretëria e Bashkuar, Spanja, Japonia dhe Brazili ishin prezentë në demonstrimin që përfshiu momentet kyçe të operacionit.

Gjuajtjet me raketat MAM-T/L dhe KEMANKES

Gjatë veprimtarisë pranë bregut të Antalyas, dy dronë të armatosur Bayraktar TB3, që u ngritën në fluturim nga TCG Anadolu për misione zjarrvënëse, mbërritën në zonën e veprimit.

Njëri Bayraktar TB3 mbante nën krahë raketat MAM-T dhe MAM-L, municion i zhvilluar kombëtarisht nga kompania Roketsan, dhe i gjuajti ato ndaj objektivave në ishullin e synuar.

TB3-i tjetër goditi objektivin me raketën KEMANKES-1, një raketë mini-lundruese e bazuar në inteligjencë artificiale, e zhvilluar nga kompania Baykar. Objektivat e caktuara u goditën me sukses.

Baykar - kampion eksporti dhe kompania më e madhe botërore e UAV-ve

Baykar, që realizon të gjitha projektet e veta me burime të brendshme, ka arritur 83 për qind të të ardhurave nga eksporti që nga fillimi i zhvillimit të teknologjisë UAV në vitin 2003. Në vitin 2023, kompania realizoi 1,8 miliardë dollarë eksport, duke u renditur ndër dhjetë eksportuesit më të mëdhenj në të gjitha sektorët në Türkiye.

Si kompania më e madhe në botë për eksportin e dronëve luftarakë, Baykar vazhdoi suksesin global edhe në vitin 2024, duke arritur sërish 1,8 miliardë dollarë eksport, ku 90 për qind e të ardhurave vinin nga jashtë vendit.

Baykar ishte ndër dhjetë eksportuesit më të mëdhenj në Türkiye në vitet 2023 dhe 2024, fitues i çmimit “kampion i eksportit”, dhe udhëheqës në sektorin e mbrojtjes dhe aviacionit në vitet 2021, 2022, 2023 dhe 2024, sipas të dhënave të Presidencës së Industrisë Mbrojtëse Turke dhe Asamblesë Turke të Eksportuesve (TIM).

Kompanitë përbënin një të tretën e eksportit të përgjithshëm të sektorit në vitin 2023 dhe një të katërtën e sektorit të mbrojtjes dhe aviacionit në vitin 2024, duke bërë Türkiyen lider në tregun global të eksportit të dronëve luftarakë.

Baykar ka nënshkruar marrëveshje eksporti me 37 vende, duke përfshirë 36 për Bayraktar TB2 dhe 16 për Bayraktar Akinci.