Presidenti i Shteteve të Bashkuara, Donald Trump, deklaroi të dielën se fushata e përbashkët ushtarake amerikano-izraelite kundër Iranit pritet të zgjasë rreth katër javë.

“Gjithmonë ka qenë një proces katërjavor,” i tha Trump gazetës Daily Mail. “Sado i fortë të jetë, është një vend i madh; do të duhen katër javë, ose më pak”, shtoi ai.

Trump tha se deri tani nuk ishte befasuar nga asnjë zhvillim i operacionit.

 “Mendoj se po ecën sipas planit, përveç faktit se kemi eliminuar të gjithë udhëheqjen e tyre, shumë, shumë më tepër sesa kishim parashikuar”, tha ai, duke përsëritur pretendimin se 48 udhëheqës iranianë janë eliminuar.

I pyetur për mundësinë që Arabia Saudite t’i bashkohet luftimeve, Trump u shpreh se mbretëria tashmë është e përfshirë.

 “Ata po luftojnë, po luftojnë edhe ata”, tha ai, ndonëse nuk ka pasur deklarata publike nga Rijadi që ta konfirmojnë këtë.

Deklaratat e Trumpit erdhën pasi një gazetar i CNN-it, në një video të publikuar e më pas të fshirë nga rrjeti, kishte thënë se princi saudit i kurorës, Mohammed bin Salman, kishte autorizuar mbretërinë të kundërpërgjigjej ndaj Iranit nëse do të ishte e nevojshme, duke e akuzuar Teheranin për shënjestrimin e Arabisë Saudite, pavarësisht se sulmet ndaj Iranit nuk janë kryer duke përdorur hapësirën ajrore saudite.

Trump shprehu gjithashtu shpresën se pas përfundimit të sulmeve në Iran mund të lindë një sistem demokratik. “Shumë gjëra tepër pozitive mund të ndodhin”, tha ai.

“Synimi ynë ishte katër deri në pesë javë”

Në një deklaratë të veçantë për New York Times, Trump tha se lufta mund të zgjasë deri në “katër deri në pesë javë”.

Ai theksoi se për Izraelin dhe ShBA-në “nuk do të jetë e vështirë” të ruajnë intensitetin e luftimeve.
“Pentagoni ka mjaftueshëm forca, raketa dhe bomba për të vazhduar sulmet ushtarake, nëse do të jetë e nevojshme,” tha ai.

“Synimi ynë ishte katër deri në pesë javë”, deklaroi Trump, kur u pyet se sa gjatë mund të vazhdojnë ShBA-ja dhe Izraeli sulmet. 

“Nuk do të jetë e vështirë”, theksoi ai. “Kemi sasi të mëdha municionesh. I kemi të depozituara në vende të ndryshme nëpër botë”.

Trump tha gjithashtu se kishte “tre zgjedhje shumë të mira” për atë se kush mund të udhëheqë Iranin.

Sipas Komandës Qendrore të ShBA-së (CENTCOM), forcat amerikane goditën qendra komanduese iraniane, baza raketash balistike, mjete detare dhe sisteme të mbrojtjes ajrore brenda 24 orëve të para që nga nisja e sulmeve të shtunën, duke përdorur bombardues strategjikë B-2, avionë luftarakë, aeroplanmbajtëse me energji bërthamore dhe shkatërrues raketorë të drejtuar, ndër të tjera.

Trump kishte deklaruar më herët se 48 udhëheqës iranianë janë eliminuar dhe se operacionet janë “përpara afatit”.

Irani ka kundërpërgjigjur me sulme me dronë dhe raketa ndaj vendeve të Gjirit. Që nga nisja e operacioneve, tre ushtarë amerikanë janë vrarë dhe pesë të tjerë janë plagosur rëndë.