Ahmed Al Ahmed, burri, trimëria e të cilit shpëtoi jetë gjatë të shtënave në Bondi Beach javën e kaluar në Sydney, i ka dhënë një mesazh të fuqishëm botës: zgjidhni njerëzimin mbi urrejtjen.
"Qëndroni me njëri-tjetrin, (jemi) të gjithë qenie njerëzore dhe harroni gjithçka të keqe (në të kaluarën)", tha Ahmed në një mesazh video për mbështetësit që dhuruan më shumë se 2.5 milionë dollarë australianë (1.65 milionë dollarë) atij dhe familjes së tij.
Ahmed, 43 vjeç, u bë një simbol global i guximit pasi sulmoi njërin nga dy personat e armatosur gjatë sulmit të së dielës përgjatë Bondi Beach, i rrëmbeu armën dhe e detyroi të dorëzohej.
Pesëmbëdhjetë persona u vranë në sulm. Një sulmues u qëllua për vdekje nga policia, ndërsa i dyti mbetet i plagosur rëndë në spital.
“Më erdhi nga zemra”
Kryeministri australian Anthony Albanese e vlerësoi Ahmedin si përfaqësues të “më të mirës së vendit tonë”, ndërsa homazhet vërshuan nga e gjithë bota.
Babai i dy fëmijëve i lindur në Siri, i cili u zhvendos në Australi në vitin 2006, u qëllua katër deri në pesë herë në shpatullën e majtë gjatë konfrontimit dhe po shërohet në Spitalin St. George të Sydney.
Ahmedi tha se veprimi i tij erdhi instiktivisht.
“Kur shpëtova njerëzit, e bëra nga zemra”, tha ai. “Ata meritojnë të shijojnë jetën. Është e drejta e tyre.”
Fushata e mbledhjes së fondeve, e mbështetur nga më shumë se 43.000 donatorë, iu prezantua Ahmedit këtë javë nga influencuesi kanadez i rrjeteve sociale Zachery Dereniowski, i njohur në internet si MDMotivator.
“Vazhdo të shpëtosh jetë.”
Duke ia dorëzuar çekun në një dhomë spitali, Dereniowski i tha: “Çdo qindarkë është e merituar.”
Ahmedi u duk i përulur nga mbështetja. “A e meritoj unë?” pyeti ai, përpara se t’i nxiste të tjerët të vazhdonin të ndihmonin njëri-tjetrin. “Vazhdo të shpëtosh jetë.”
Duke e quajtur Australinë “vendi më i mirë në botë”, Ahmedi tha se shpreson që historia e tij të dërgojë një mesazh më të gjerë përtej vetë tragjedisë - një mesazh dhembshurie, uniteti dhe humanizmi të përbashkët.
