Një sërë shpërthimesh dhe të shtëna armësh tronditën kryeqytetin afgan, Kabulin, raportuan mediat lokale dhe dëshmitarët.
Shkaku i shpërthimeve të ndodhura herët të premten dhe mundësia për viktima mbeten ende të paqarta.
Banorët thanë se pas shpërthimit dëgjuan edhe të shtëna armësh.
“Tingulli i një shpërthimi është dëgjuar në Kabul”, shkroi në X zëdhënësi kryesor i administratës së përkohshme, Zabihullah Mujahid.
“Por, askush nuk duhet të shqetësohet, gjithçka është mirë. Incidenti është nën hetim dhe deri tani nuk janë raportuar të lënduar”, shtoi ai.
Shpërthimet ndodhën në të njëjtën kohë kur ministri i Jashtëm afgan mbërriti në Indi për bisedime që synojnë forcimin e marrëdhënieve ekonomike me Nju Delhin, vizita e parë e këtij niveli nga një udhëheqës i talebanëve që nga marrja e pushtetit në vitin 2021.
Vizita gjashtëditore e Amir Khan Muttaqit nënvizon përpjekjet e administratës së përkohshme talebane për të thelluar angazhimin me fuqitë rajonale dhe për të siguruar njohje diplomatike në të ardhmen.
