Mali i Zi mbylli kapitullin 32 të negociatave - Mbikëqyrja Financiare të hënën në Konferencën Ndërqeveritare në Bruksel, duke arritur kështu përparim të ri në rrugën drejt anëtarësimit në Bashkimin Evropian (BE), duke mbyllur gjithsej 13 kapituj.

Komisarja Evropiane për Zgjerimin, Marta Kos, tha se mbyllja e kapitullit ishte e rëndësishme dhe vlerësoi se Mali i Zi është në rrugën e duhur për t’i mbyllur të gjithë kapitujt e mbetur deri në fund të vitit. Ajo deklaroi se vendi është një shembull pozitiv në rajon.

Kryeministri malazez, Milojko Spajiq, tha se mbyllja e kapitullit 32 ishte "themelore" dhe se shpejtësia e progresit tregon se procesi i zgjerimit të BE-së është ende gjallë. Ai shtoi se Mali i Zi pret anëtarësim të plotë në BE.

Kapitulli 32 ka të bëjë me kontrollin e brendshëm financiar publik, auditimin e jashtëm dhe menaxhimin transparent dhe të përgjegjshëm të fondeve kombëtare dhe të BE-së.

Mali i Zi aplikoi për anëtarësim në Bashkimin Evropian në vitin 2008, mori statusin e kandidatit në vitin 2010 dhe filloi negociatat e pranimit me BE-në në qershor 2012.