Qytetarët e Afrikës së Jugut shprehën reagime të përziera të dielën pasi Departamenti i Punëve të Brendshme tërhoqi përjashtimin 90-ditor të vizave për mbajtësit e pasaportave palestineze, duke cituar fluturimet e fundit “misterioze” nga Izraeli që transportuan qindra palestinezë në vend.
Departamenti tha në një deklaratë të shtunën se e tërhoqi përjashtimin pas hetimeve që konfirmuan abuzimin e qëllimshëm dhe të vazhdueshëm të përjashtimit 90-ditor për pasaportat e zakonshme palestineze nga aktorë izraelitë të lidhur me përpjekje për “emigrim vullnetar” të banorëve të Rripit të Gazës.
Muajin e kaluar, një avion i çartuar nga Izraeli, i cili bëri një ndalesë në Kenia, solli 153 refugjatë palestinezë nga Gaza në Afrikën e Jugut. Në fund të tetorit, një avion tjetër solli 176 palestinezë.
“Terheqja e përjashtimit të vizës është mënyra më efektive për të parandaluar fluturime të tjera të kësaj natyre, duke siguruar që udhëtarët e mirëfilltë nga Palestina të mund të vizitojnë Afrikën e Jugut pa u përballur me abuzime,” tha departamenti.
Ai shtoi se Afrika e Jugut nuk do të bëhet pjesë e asnjë skeme që synon të shfrytëzojë ose zhvendosë palestinezët nga Gaza.
Departamenti i Punëve të Brendshme tha gjithashtu se hetimet treguan se mbërritja e fluturimeve të çartuara nuk ishte menduar të ishte një ngjarje e vetme, por mund të jetë pjesë e një përpjekjeje më të gjerë dhe të vazhdueshme për të zhvendosur palestinezët në pjesë të tjera të botës.
Ai shtoi se pas tërheqjes së përjashtimit të vizave, do të përpunojë në mënyrë të rregullt çdo kërkesë për azil të paraqitur nga udhëtarët që mbërritën me fluturimet e çartuara, ndërsa do të respektojë kushtet e përjashtimit 90-ditor për ata që nuk kërkojnë azil.
“Dënim kolektiv”
Roshan Dadoo, koordinatore e Koalicionit BDS-ës të Afrikës së Jugut, tha për Anadolu në një intervistë telefonike të dielën se heqja e përjashtimit 90-ditor të vizës është e ngjashme me dënim kolektiv për të gjithë palestinezët.
“Ne kemi bërë fushatë për një kohë të gjatë që vizitorëve palestinezë t’u jepet viza 90-ditore në hyrje, dhe u gëzuam kur qeveria e zbatoi,” tha ajo.
Dadoo tha se pajtohet plotësisht me komentet e ministrit të Punëve të Brendshme Leon Schreiber lidhur me abuzimin e palestinezëve nga ‘aktorët’ izraelitë të lidhur me fluturimet.
Ajo tha se nëse ka shqetësime sigurie për fluturime të tjera të mundshme të çartuara që mund të shkojnë drejt Afrikës së Jugut, atëherë qeveria duhet ta drejtojë reagimin ndaj kompanive ajrore duke mos lejuar leje fluturimi apo uljeje.
“Mos e ktheni këtë në dënim kolektiv ndaj të gjithë mbajtësve të pasaportave palestineze, qoftë ata që vijnë nga Gaza apo Bregu Perëndimor. Ka njerëz që vijnë javën tjetër për konferenca dhe vizita. Nuk mund të vendosësh papritur brenda natës të anulosh vizën për të gjithë mbajtësit e pasaportave palestineze,” tha ajo.
Dadoo shtoi se nuk ka asnjë mundësi për njerëzit në Gaza të aplikojnë për viza, pasi Afrika e Jugut ka zyra përfaqësuese në Ramallah, e cila është shumë larg.
“Qytetarët e Afrikës së Jugut duhet të dënojnë fuqishëm vendimin e Departamentit të Punëve të Brendshme për të pezulluar përjashtimin 90-ditor të vizës për palestinezët. Ky hap, i lidhur me pretendime të paverifikuara për fluturime të çartuara, ndëshkon padrejtësisht një komunitet tashmë të cenueshëm dhe ushqen narrativa ksenofobike,” tha për Anadolu Ahmed Jhazbhay, ligjërues i shkencave politike në Universitetin e Afrikës së Jugut.
Jhazbhay tha se Afrika e Jugut ka një detyrim moral dhe historik të qëndrojë në krah të popujve të shtypur, jo t’u nënshtrohet politikave të shtyra nga frika që i ngjajnë kufizimeve të epokës së aparteidit.
