Zyrtarët britanikë po e shqyrtojnë mundësinë e dërgimit të mijëra dronëve interceptorë në Lindjen e Mesme për të kundërshtuar dronët iranianë Shahed, sipas një raporti të gazetës The Telegraph.
Sistemet kundër dronëve “Octopus”, që aktualisht prodhohen në Mbretërinë e Bashkuar për përdorim nga Ukraina kundër Rusisë, mund të përshtaten për të mbrojtur forcat britanike dhe aleatët e tyre në rajon, thuhet në raport.
Prodhimi i këtyre interceptorëve është rritur në mijëra njësi në muaj.
Një burim i mbrojtjes i tha Telegraph se Mbretëria e Bashkuar po shqyrton se si ekspertiza dhe teknologjia ukrainase mund të shfrytëzohen për të përballuar kërcënimin që paraqesin dronët e tipit Shahed.
“Ukraina është qartë prioriteti i parë për këtë kapacitet. Por përtej kësaj, boshti i agresionit mes Rusisë dhe Iranit është i qartë. Dronët e stilit Shahed janë një pjesë kyç e arsenaleve të tyre”, tha burimi.
Vendosja e mundshme e këtyre sistemeve vjen mes kritikave nga presidenti amerikan Donald Trump dhe zyrtarë ushtarakë, të cilët e konsiderojnë reagimin e Mbretërisë së Bashkuar ndaj konfliktit me Iranin si të kujdesshëm.
Trump i ka bërë thirrje Londrës të kontribuojë me anije në Ngushticën e Hormuzit si pjesë e një përpjekjeje ndërkombëtare për ta garantuar kalimin e sigurt të dërgesave të naftës. Britania ka thënë se po shqyrton dërgimin e një anijeje, por ende nuk ka marrë një vendim përfundimtar.
“Ndërsa ky konflikt vazhdon, duhet patjetër të shohim se si mund të përfitojmë nga ekspertiza dhe inovacioni ukrainas”, tha burimi, duke shtuar se kjo lëvizje mund të përfitojë sigurinë e Mbretërisë së Bashkuar dhe mbështetjen për Ukrainën.
