Ushtria izraelite kërcënoi të shtunën se do të godasë objekte mjekësore dhe ambulanca në Liban, duke pretenduar se ato po përdoren për qëllime ushtarake nga grupi libanez Hezbollah.

Paralajmërimi erdhi disa orë pasi një sulm izraelit goditi një qendër shëndetësore në Libanin jugor, duke vrarë 12 punonjës të personelit mjekësor, përfshirë mjekë, paramedikë dhe infermierë.

Zëdhënësi i ushtrisë izraelite, Avichay Adraee, deklaroi në një njoftim se Hezbollah po bën “përdorim të gjerë ushtarak të ambulancave” si pjesë të aktiviteteve të tij.

Ai paralajmëroi se ushtria do t’i godasë objektet mjekësore dhe ambulancat nëse Hezbollah nuk ndalon përdorimin e tyre për qëllime ushtarake.

Nuk pati reagim të menjëhershëm nga Hezbollah.

Hezbollahu filloi të godasë objektiva ushtarake izraelite më 2 mars, në përgjigje të sulmeve të përbashkëta të ShBA-së dhe Izraelit ndaj Iranit që vranë Udhëheqësin Suprem të atëhershëm Ali Khamenei në Teheran, si dhe ndaj sulmeve izraelite në Liban, pavarësisht një armëpushimi të arritur në nëntor 2024.

Izraeli e zgjeroi fushatën e tij po atë ditë me sulme ajrore në periferitë jugore të Bejrutit, si dhe në zona në Libanin jugor dhe lindor.

Më 3 mars, Izraeli gjithashtu nisi një inkursion të kufizuar tokësor në Libanin jugor, paralelisht me fushatën e përbashkët ushtarake me ShBA-në kundër Iranit që kishte nisur më 28 shkurt.

Autoritetet libaneze thanë të enjten se sulmet e zgjeruara të Izraelit kanë vrarë 733 persona, kanë plagosur 1,933 dhe kanë zhvendosur 822.000 të tjerë.