Hamasi paralajmëroi të dielën për përpjekje për “riformësimin” e Rripit të Gazës dhe zhvendosjen e palestinezëve nga enklava, në përputhje me planet izraelite.

Në një deklaratë me rastin e 38-vjetorit të themelimit të grupit, Hamasi paralajmëroi për një “komplot në përpjekjet për zhvendosje dhe riformësim të Rripit të Gazës sipas planeve të armikut (izraelit)”, duke theksuar se populli palestinez është autoriteti i vetëm që zgjedh udhëheqësit e tij dhe se është i aftë t’i menaxhojë punët e veta.

Hamasi e përshkroi arritjen e një konsensusi kombëtar për një strategji të unifikuar palestineze si “rrugën e vetme për t’u përballur me planet e okupimit (izraelit) dhe mbështetësve të tij, të cilët synojnë të likuidojnë kauzën tonë kombëtare dhe ta pengojnë themelimin e shtetit tonë të pavarur me Jerusalemin Lindor si kryeqytet”.

Gjatë dy viteve të luftës gjenocidale në Rripin e Gazës, “okupimi (izraelit) nuk ka arritur asgjë tjetër përveç shënjestrimit kriminal të civilëve të paarmatosur”, tha Hamasi.

“Krimet sistematike dhe të mirëdokumentuara të armikut sionist gjatë dy viteve të gjenocidit dhe urisë në Rripin e Gazës, në Bregun Perëndimor dhe në Jerusalemin e pushtuar nuk do të skadojnë”, shtohet në deklaratë, duke i bërë thirrje Gjykatës Ndërkombëtare të Drejtësisë dhe Gjykatës Penale Ndërkombëtare të vazhdojnë procedurat ligjore dhe të sigurojnë që udhëheqësit izraelitë të mbahen përgjegjës për krimet që nga tetori i vitit 2023.

Duke konfirmuar respektimin e marrëveshjes së armëpushimit, Hamasi u bëri thirrje ShBA-së dhe ndërmjetësve të tjerë të marrëveshjes që ta detyrojnë Izraelin të ndalojë shkeljet e tij, të hapë pikat kufitare për hyrjen e pakufizuar të ndihmës humanitare dhe të zbatojë menjëherë planet e ndihmës, strehimit dhe rindërtimit për më shumë se 2 milionë palestinezë.

Hamasi gjithashtu shprehu refuzimin e tij kategorik të “çdo forme kujdestarie apo mandati mbi Rripin e Gazës ose mbi qoftë edhe një centimetër të tokës sonë të pushtuar”.

Marrëveshja e armëpushimit ndërmjet Izraelit dhe Hamasit hyri në fuqi në Gaza më 10 tetor, duke ndalur sulmet izraelite që kishin zgjatur më shumë se dy vjet dhe që, që nga tetori i vitit 2023, kanë shkaktuar vdekjen e mbi 70.000 personave, kryesisht gra dhe fëmijë, si dhe plagosjen e rreth 171.000 të tjerëve.

Megjithatë, ushtria izraelite e ka shkelur disa herë armëpushimin, duke vrarë të paktën 386 palestinezë dhe duke plagosur 1.018 të tjerë që nga 10 tetori.