Ministria e Kulturës e Sllovenisë ka shprehur mbështetje për Radiotelevizionin e Sllovenisë (RTV), transmetuesin publik të vendit, i cili vendosi të tërhiqet nga Festivali i Këngës "Eurovision 2026" pasi Izraelit iu dha leja për të marrë pjesë.
Ministria sllovene e Kulturës në një deklaratë për Anadolu komentoi mbi veprimin e transmetuesit publik RTV, i cili njoftoi tërheqjen e tij nga Festivali i Këngës Eurovision pas vendimit të Unionit Evropian të Transmetimeve (EBU) për ta mbajtur Izraelin në garë.
Në deklaratën me shkrim nga ministria thuhet se vendimi i Sllovenisë për të mos marrë pjesë në Festivalin e Këngës "Eurovision 2026" në Austri u mor nga menaxhmenti i RTV-së dhe se transmetuesi publik RTV vepron në mënyrë të pavarur dhe është autonom në aspektin e gazetarisë, transmetimit dhe financave.
"Si ministri, ne mbështesim vendimin e RTV-së në lidhje me Eurovisionin", thuhet në deklaratë duke shtuar nevojën për të rritur presionin diplomatik kundër Izraelit.
"Mizoritë kundër palestinezëve në Gaza dhe Bregun Perëndimor duhet të marrin fund menjëherë", shton deklarata.
RTV: Nuk mund ta ndajmë të njëjtën skenë me Izraelin, i cili ka vrarë mbi 20 mijë fëmijë
Kryetarja e Bordit të RTV-së, Natalija Gorscak tha më parë për Anadolu: "Nuk mund ta ndanim skenën me Izraelin, i cili shkatërroi 92 për qind të Gazës, vrau mbi 20 mijë fëmijë dhe mbi 250 gazetarë. Nuk mund të flasim për rolin unifikues të muzikës përkrah përfaqësuesve të një regjimi që nuk respekton të drejtat e njeriut. Ne jemi transmetues publik dhe duhet të mbështesim vlera të larta etike".
Ajo theksoi se transmetuesit publikë duhet të veprojnë brenda udhëzimeve etike dhe të njëjtave rregulla për të gjithë. "Ne e morëm këtë vendim nga respekti për popullin e Gazës. Historia do të tregojë se ishim në anën e duhur, ne i besojmë kësaj", tha Gorscak.
Spanja, Holanda, Irlanda dhe Islanda vendosën të tërhiqen nga Eurovisioni
EBU-ja mbajti mbledhjen e 95-të të Asamblesë së Përgjithshme në Gjenevë, Zvicër, më 4 dhjetor.
Pas takimit ku Izraelit iu lejua pjesëmarrja në Festivalin e Këngës "Eurovision 2026", transmetuesit publikë të Spanjës, Holandës, Irlandës dhe Islandës protestuan kundër vendimit dhe vendosën të tërhiqen nga Eurovisioni.
