Katër komunat në veri, pas rikthimit të Listës Serbe kanë marrë vendim për të dalë nga Asociacioni i Komunave të Kosovës. Këto vendime tashmë pritet t’i nënshtrohen shqyrtimit të Ministrisë së Administrimit të Pushtetit Lokal, e cila do të vendosë për ligjshmërinë dhe zbatimin e tyre.

Kuvendi Komunal i Zveçanit ka miratuar me shumicë votash vendimin për daljen e kësaj komune nga Asociacioni i Komunave të Kosovës, me 14 vota pro dhe një kundër, ku kundër ishte asamblisti i vetëm shqiptar në këtë kuvend, Ilir Peci, nga Partia Demokratike e Kosovës.

Sipas tij, propozimi u hodh në votim nga kryetari i komunës, i cili theksoi se largimi nga Asociacioni është kërkuar që nga viti 2013.

“Gjatë mandatit tim ky vendim është votuar në favor të largimit. Unë kam qenë kundër, por vendimi u aprovua me shumicë votash. Tani gjithçka varet nga aprovimi ose jo nga Ministria e Administrimit të Pushtetit Lokal”, ka deklaruar Peci për KosovaPress.

Ai ka shtuar se në Kuvendin Komunal të Zveçanit janë 13 asamblistë nga Lista Serbe, një nga një listë tjetër dhe vetëm një asamblist shqiptar, duke theksuar se në këto rrethana nuk ka pasur mundësi reale për ta ndalur vendimin.

“Çdo vendim apo rregullore e nxjerrë gjatë mandatit tonë dyvjeçar e gjysmë, ata kanë tentuar ta rrëzojnë. Tani vendimi është në dorë të ministrisë dhe mbetet të shihet se çfarë vendimi do të merret”, ka thënë ai.

Vendim të ngjashëm ka marrë edhe Kuvendi Komunal i Mitrovicës së Veriut, i cili në seancën e parë të përbërjes së re miratoi largimin nga Asociacioni i Komunave të Kosovës. Vendimi u propozua nga kryetari i komunës, Millan Radojeviq.

Radojeviq tha se vendimi i mëparshëm për anëtarësim ishte marrë pa debat publik dhe pa konsultime me qytetarët, duke theksuar se komuna nuk ka përfituar asnjëherë nga ky asociacion.

“Kërkesa e qytetarëve që na kanë dhënë mandatin është e qartë. Kuvendi Komunal duhet të votojë për daljen e Komunës së Mitrovicës së Veriut nga Asociacioni i Komunave të Kosovës. Çdo aderim i mëtejshëm në ndonjë asociacion tjetër duhet të vendoset nga vetë qytetarët”, ka deklaruar Radojeviq gjatë seancës.

Përveç Zveçanit dhe Mitrovicës së Veriut, edhe Leposaviqi dhe Zubin Potoku kanë votuar për t’u tërhequr nga Asociacioni i Komunave të Kosovës.

Këto vendime vijnë pasi Lista Serbe u rikthye në pushtet në katër komunat veriore pas zgjedhjeve lokale të 12 tetorit. Të gjitha këto vendime tashmë pritet t’i nënshtrohen shqyrtimit të Ministrisë së Administrimit të Pushtetit Lokal, e cila do të vendosë për ligjshmërinë dhe zbatimin e tyre.