Српската влада во понеделник одлучи да формира оперативен тим, чија улога ќе биде координирање на забрзаното спроведување на сите обврски на европскиот пат на Србија, а кој ќе биде составен од претставници на највисоко државно ниво.

Како што објави српската влада, ова е изменета одлука за формирање на Координативното тело за процесот на пристапување на Србија кон Европската унија.

Задачата на оперативниот тим ќе биде да обезбеди стратешки насоки, политичка координација и навремено решавање на прашања од особено значење за напредокот во преговорите за пристапување.

Како што е наведено, овој тим претставува врска помеѓу донесувањето одлуки на највисоко ниво и оперативното водење на преговорите и ќе придонесе за координирано дејствување на сите надлежни институции, објави Танјуг.

Исто така, се додава дека Министерството за европски интеграции продолжува да извршува професионални, организациски и административни координативни задачи, како и да обезбеди координирана работа на сите учесници во процесот на преговори.

Српскиот претседател Александар Вучиќ вчера на тематска седница на српската Влада предложи да се формира оперативен тим со цел зајакнување на капацитетите и Србија побрзо да напредува на својот европски пат, и го номинираше шефот на српската мисија во ЕУ во Брисел, Даниел Апостоловиќ, за претседател на тој оперативен тим.

Тој, исто така, предложи во тимот да бидат вклучени министерот за европски интеграции Немања Старовиќ, претседателката на Собранието Ана Брнабиќ, како и министрите за финансии Синиша Мали и за правда Ненад Вујиќ.

Србија поднесе барање за членство во Европската Унија во 2009 година, доби статус на кандидат во 2012 година, а официјално ги започна преговорите за пристапување со ЕУ во јануари 2014 година.