Врховниот лидер на Иран, Моџтаба Хамнеи, вети дека „криминалните убијци“ кои стојат зад убиството на високиот безбедносен службеник Али Лариџани „наскоро ќе мора да платат“.

Во соопштението од средата, Хамнеи рече дека „со длабока тага“ ја примил веста за убиството на Лариџани, секретар на Врховниот совет за национална безбедност, заедно со неговиот син и неколку колеги.

Тој го опиша Лариџани како „човек со знаење, предвидливост и мудрост“, додавајќи дека речиси пет децении служба во политичките, воените, безбедносните, културните и административните области го направиле „истакната личност“.

Хамнеи рече дека убиството на Лариџани „сведочи за неговата важност и непријателството што го негуваат непријателите на исламот кон него“, предупредувајќи дека „пролевањето на крвта на таквите луѓе... само ќе го направи посилен“.

„Секоја капка крв има своја достојна одмазда“ и дека „криминалните убијци на овие маченици наскоро ќе мора да платат“, вети тој.

Еден од највисоко рангираните убиени функционери

Иранските власти соопштија дека Лариџани е убиен рано во вторник во американско-израелски напад во кој загинаа и неговиот син Мортеза, неговиот помошник Алиреза Бајат, неколку членови на персоналот на советот и телохранители.

Лариџани беше меѓу највисоко рангираните функционери убиени од почетокот на американско-израелската војна против Иран минатиот месец.

Шефот на иранската армија, Амир Хатами, предупреди во среда дека одговорот на Техеран на убиството на Лариџани ќе биде „решителен и убијците ќа зажалат“.

Во среда, Револуционерната гарда, исто така, соопшти дека веќе започнале ракетни напади врз централен Израел „како одмазда за крвта на маченикот д-р Али Лариџани и неговите придружници“.

Иранскиот претседател Масуд Пезешкијан, пак, порано денеска ја потврди смртта на министерот за разузнавање Есмаил Хатиб во израелски напад.

Во објава на X, Пезешкијан рече: „Кукавичкиот атентат врз моите драги колеги Есмаил Хатиб, Али Лариџани и Азиз Насирзаде, заедно со некои членови на нивните семејства и оние во придружниот тим, нè остави во жалост“.

САД и Израел ја продолжија заедничката офанзива врз Иран од 28 февруари, при што досега загинаа околу 1.300 луѓе, вклучувајќи го и тогашниот врховен лидер Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Заливот кои се домаќини на американски воени средства, предизвикувајќи жртви и штети на инфраструктурата, а воедно ги наруши глобалните пазари и авијацијата.