Украина ја прифати понудата на Европската Унија за техничка поддршка и финансирање за обновување на протокот на нафта кон Унгарија и Словачка преку оштетениот нафтовод Дружба, објави во вторник претседателот на Советот на ЕУ, Антонио Кошта.

Во писмо упатено до ЕУ, украинскиот претседател Володимир Зеленски изјави дека работата на поправката на нафтоводот е при крај и дека се очекува пумпната станица да биде обновена за месец и половина „доколку нема нови руски напади“.

Унгарија во понеделник објави дека ќе продолжи да го блокира заемот од 90 милијарди евра за Украина и новите санкции против Русија, сè додека протокот на нафта низ нафтоводот Дружба не биде повторно пуштен.

Протокот на руска нафта низ тој нафтовод кон Унгарија и Словачка е суспендиран од крајот на јануари.

Киев тврди дека опремата на нафтоводот Дружба во западна Украина била погодена во руски напад, додека Словачка и Унгарија тврдат дека Украина е виновна за продолжениот прекин.

„Обвинувањата дека Украина намерно го попречува транспортот на нафта преку нафтоводот Дружба се неосновани“, рече Зеленски во писмо до Кошта и претседателката на Европската комисија, Урсула фон дер Лајен.

Во писмо до Зеленски, двајцата лидери на ЕУ рекоа дека континуираниот проток на нафта низ Украина е од големо значење за зачувување на стабилноста на пазарот и ќе биде во согласност со договорните обврски на Украина.

Тие, исто така, ја повторија својата претходно објавена обврска за постепено укинување на целиот преостанат увоз на нафта од Русија до крајот на 2027 година.