Израелската армија денеска објави дека нејзините трупи започнале ограничени и насочени копнени операции против упориштата на Хезболах во јужен Либан.

Силите од 91-та дивизија ги започнаа операциите за „зајакнување“ на напредната одбранбена зона долж северната граница на Израел, соопшти армијата преку американската компанија за социјални медиуми X.

Војската соопшти дека активноста е дел од „пошироки одбранбени напори“ насочени кон воспоставување и зајакнување на напредна одбранбена позиција.

Овие операции вклучуваат демонтирање на инфраструктурата на либанската група Хезболах и елиминирање на нејзините членови што дејствуваат во областа, за да се отстранат заканите и да се додаде уште еден слој безбедност за жителите на северен Израел, додаде армијата.

Пред трупите да влезат во областа, израелските сили таргетираа многу позиции на Хезболах со артилерија и воздушни напади извршени од израелските воздухопловни сили за да ги намалат заканите во оперативната средина, соопшти армијата.

Војската, исто така, истакна дека ќе продолжи да дејствува против Хезболах, кого го обвини дека се приклучил на непријателствата под она што го опиша како спонзорство на иранската влада.