Германија мора да изгради силни вооружени сили кои ќе одговараат на нејзината големина и економска моќ и ќе ги исполнуваат своите одговорности за безбедноста на Европа, изјави денеска канцеларот Фридрих Мерц.

Во видео говор на годишниот форум на германските вооружени сили, Мерц ја опиша Русија како „најголема“ закана за Европа. Тој рече дека мирот, слободата и безбедноста на Европејците се под „сериозна“ закана.

„Ние Германците сфативме дека мирот во Европа повеќе не може да се зема здраво за готово. Заканата од Русија е реална. Го гледаме тоа и во Германија, со хибридни напади секој ден - саботажа, шпионажа, сајбер напади, прелети со беспилотни летала, убиства по нарачка и целни кампањи за дезинформација “, рече тој.

Мерц ја повтори целта на неговата влада да ја изгради најсилната армија на ЕУ за да ја одврати руската закана и вети дека ќе ги зголемат трошоците за одбрана, ќе обезбедат доволно средства за модернизација на германските вооружени сили, Бундесверот, и ќе ги опремат со напредни капацитети.

„Нашите сојузници во НАТО и партнерите од ЕУ гледаат кон нас особено како на трета најголема економија во светот. Сакаме Бундесверот да го направиме најсилната конвенционална армија во ЕУ - сила соодветна за земја со наша големина и одговорност“, рече германскиот канцелар.

Мерц, исто така, истакна дека владата планира да спроведе сеопфатни реформи за зајакнување на регрутирањето и задржувањето, справувајќи се со тековните предизвици со персоналот на Бундесверот. Тој вети дека ќе ги обезбедат потребните ресурси и ќе преземат нови мерки за да ја направат воената служба попривлечна за младите луѓе.