Прославата на победата на фудбалерите на ПСЖ против Арсенал, со која клубот од Париз се пласираше во финалето на Лигата на шампиони еруптираше во насилство.

Илјадници навивачи ја исполнија култната авенија Шанзелизе, палејќи факели, мавтајќи со знамиња, скандирајќи и прославувајќи ја победата.

Најмалку три лица се повредени во намерно предизвикана сообраќајна несреќа откако автомобил се заби во толпата што го славеше пласманот на ПСЖ во финалето.

Според медиумските извештаи, инцидентот се случил во близина на Шанзелизе во хаотична ноќ. Во 3 часот наутро, париската полиција пријави апсење на 43 лица, палење автомобили и голема штета на продавници.

„Ле Паризиен“ додава дека некои навивачи фрлале предмети кон полицијата, која морала да употреби солзавец за да ја растера толпата. Главниот полициски синдикат се пожали на социјалните мрежи за хаосот во Париз.

„Каква врска има ова со спортот? Ова се сцени што не треба да ги гледаме по победа. Штета, изгорените автомобили... Долга ноќ за нашите колеги во Париз.“