Tajlanda nisi sulme ajrore përgjatë kufirit të saj të diskutueshëm me Kamboxhian të hënën në mëngjes, pas përleshjeve të reja që lanë 1 ushtar tajlandez të vdekur dhe 4 të plagosur.

Forcat Ajrore Tajlandeze thanë se përdorën avionë luftarakë F-16 për të goditur pozicionet kamboxhiane në zonën kufitare Chong Ahn Ma në "hakmarrje për një seri sulmesh kamboxhiane", raportoi transmetuesi shtetëror "Thai PBS World".

Zëdhënësi i Ushtrisë Tajlandeze, Gjeneral Major Winthai Suvaree, tha se avionët luftarakë u urdhëruan të vepronin pasi forcat kamboxhiane përdorën artileri dhe municione ajrore kundër trupave tajlandeze në Bazën Anupong.

"Pozicionet po sulmonin në mënyrë aktive forcat tajlandeze", tha ai, duke shtuar se operacionet ishin në vazhdim.

Kamboxhia tha se sulmet minojnë angazhimet e marra sipas marrëveshjes së armëpushimit, e cila kërkonte që të dyja palët të përmbaheshin nga veprimet armiqësore dhe të zgjidhnin mosmarrëveshjet me mjete paqësore, raportoi "Khmer Times".

Ministria e Mbrojtjes Kombëtare e Kamboxhias akuzoi forcat tajlandeze për nisjen e një serie sulmesh "brutale dhe çnjerëzore" ndaj trupave kamboxhiane përgjatë kufirit në provincën Preah Vihear, duke e quajtur incidentin një shkelje serioze të marrëveshjes së paqes.

Një numër i madh civilësh thuhet se po evakuohen nga komunitetet kufitare në të dyja anët e zonës së konfliktit.

Mosmarrëveshja u përshkallëzua në përleshje vdekjeprurëse në korrik, duke zhvendosur mijëra njerëz.

Kamboxhia dhe Tajlanda nënshkruan një marrëveshje armëpushimi në Kuala Lumpur më 26 tetor në margjinat e Samitit të ASEAN-it, në prani të Presidentit të ShBA-së, Donald Trump dhe kryeministrit malajzian, Anwar Ibrahim, në një përpjekje për të zgjidhur mosmarrëveshjen e tyre të gjatë kufitare.