Aeroporti i Istanbulit vitin e kaluar ishte aeroporti i dytë më i ngarkuar në Evropë dhe i shtati në rang botëror, deklaroi të hënën presidenti Recep Tayyip Erdoğan.
Aeroporti u shërbeu 84,5 milionë pasagjerëve ajrorë në vitin 2025, tha Erdoğan gjatë një ceremonie hapjeje në Aeroportin Esenboga, në Ankara.
“Me synimin për të arritur çdo cep të botës, ne e kemi bërë Türkiyen një nga vendet me rrjetin më të shtrirë të fluturimeve në botë”, u shpreh ai.
Erdoğan theksoi se duke rritur numrin e vendeve nga 81 në 175, Türkiye u bë vendi me më shumë marrëveshje për transportin ajror në botë.
Në vitin 2002, numri i pasagjerëve që udhëtonin në fluturime të brendshme dhe ndërkombëtare në Türkiye ishte vetëm 34,5 milionë, ndërsa në vitin 2025 ky numër e kaloi 247 milionë, tha ai.
Me pistën e tretë dhe kullën e re, kapaciteti vjetor i Aeroportit Esenboga do të rritet gjithashtu nga 20 milionë në 30 milionë pasagjerë, shtoi Erdoğan.
Ai tha se pjesët e reja të aeroportit, në kuadër të projekteve me vlerë 298 milionë euro (347 milionë dollarë), janë ndërtuar pa asnjë shpenzim nga Thesari i shtetit.
