Franca tha të hënën se Parisi dhe Berlini kanë rënë dakord për nevojën që të reagojnë “fort dhe shpejt” përballë kërcënimeve të reja të ShBA-së me tarifa ndaj disa vendeve evropiane, lidhur me çështjen e Grenlandës.

“Franca dhe Gjermania bien dakord për vullnetin dhe domosdoshmërinë absolute për të reaguar fort dhe shpejt”, u tha gazetarëve ministri i Financave, Roland Lescure, gjatë një takimi të Eurogrupit në Bruksel.

Ai ritheksoi rëndësinë e unitetit dhe të “thënit thjesht jo” ndaj këtyre kërcënimeve, të cilat i cilësoi si “akte shtrëngimi”.

“Evropa duhet të ngrihet në këmbë. Siç mendoj se biem të dy dakord, po jetojmë kohë të panjohura. Këtë nuk e kemi parë kurrë më parë. Një aleat, një mik prej 250 vitesh, po shqyrton përdorimin e tarifave”, theksoi Lescure. “Ne nuk duam që tarifat të përdoren si armë”.

Ai i bëri thirrje më tej bllokut evropian të sigurojë që kërcënimet të mos bëhen realitet, duke kërkuar gatishmëri për t’u përgjigjur në mënyrë të bashkuar dhe të fortë.

“Duhet të jemi në gjendje të tregojmë se jemi të gatshëm të përdorim të gjitha instrumentet që kemi në dispozicion, qoftë tarifat, qoftë marrëveshjet tregtare, qoftë masat kundër shtrëngimit”, shtoi Lescure.

Të shtunën, presidenti amerikan Donald Trump tha se do të vendoste tarifa prej 10 për qind ndaj Mbretërisë së Bashkuar, Danimarkës, Norvegjisë, Suedisë, Francës, Gjermanisë, Holandës dhe Finlandës deri më 1 shkurt, me rritje në 25 për qind deri më 1 qershor, për shkak të kundërshtimit të tyre ndaj kontrollit amerikan mbi Grenlandën dhe dërgimit të personelit ushtarak në këtë territor gjysmë-autonom danez.

Vendet evropiane kanë dënuar kërcënimin e ShBA-së, duke riafirmuar angazhimin e tyre për sigurinë në Arktik.