Rusia dhe Ukraina kanë raportuar viktima dhe dëme në infrastrukturën lokale pas sulmeve me dronë gjatë natës.

Në Rusi, një person u vra dhe tre të tjerë u plagosën si pasojë e një sulmi ukrainas me dronë në rajonin e Voronezhit. 

Guvernatori i Voronezhit, Aleksandr Gusev, shkroi të dielën në Telegram se qendra administrative e rajonit u përball me “një nga sulmet më të rënda me dronë” që nga fillimi i luftës në Ukrainë.

“Fatkeqësisht, një grua e re ndërroi jetë mbrëmë në kujdes intensiv pasi u plagos kur mbetjet e një droni ranë mbi një banesë private”, tha Gusev.

Ai shtoi se një grua tjetër vijon të jetë e shtruar në spital me dëmtime në bark, ndërsa dy persona të tjerë po marrin trajtim ambulator për prerje. 

Sipas tij, autoritetet dhe shërbimet e emergjencës po vazhdojnë punën në zonat e dëmtuara, të cilat përfshijnë mbi 10 ndërtesa banimi, njëra prej tyre jo-rezidenciale, si dhe një numër të ngjashëm shtëpish private, një shkollë të mesme dhe disa ndërtesa administrative.

Ministria ruse e Mbrojtjes deklaroi se mbrojtja ajrore ka rrëzuar 33 dronë ukrainas gjatë natës, 17 prej tyre mbi rajonin e Voronezhit.

Sulme në Ukrainë

Ukraina ende nuk ka komentuar mbi sulmin në Voronezh, por Forcat Ajrore ukrainase njoftuan në Telegram se kanë rrëzuar 125 nga 154 dronët e lëshuar nga Rusia gjatë natës mbi territorin e vendit.

Në rajonin veriperëndimor të Zhytomyrit, guvernatori Vitalii Bunechko tha se sulmet gjatë natës goditën objekte të infrastrukturës kritike, duke çuar në shtrimin në spital të dy punonjësve që pësuan plagë të moderuara.

Ndërkohë, Shërbimi Shtetëror i Emergjencave i Ukrainës njoftoi se katër persona u plagosën pas sulmeve në fshatin Movchany, i cili ndodhet në jug të qytetit të dytë më të madh të vendit, Kharkivit, rreth 30 kilometra nga kufiri me Rusinë.

“Sulmimet shkaktuan shkatërrime dhe dëme në banesa, si dhe një zjarr në një sipërfaqe prej 150 metrash katrorë”, thuhet në njoftim.