Ministri i jashtëm i Gjermanisë kritikoi ashpër Rusinë dhe Kinën të martën vonë për mbështetjen e vazhdueshme që i japin regjimit iranian, në një kohë kur vendi po përballet me protesta të gjera kundër qeverisë.

“Bashkëpunimi mes Iranit, Rusisë dhe pjesërisht edhe Kinës – ky trekëndësh është përgjegjës për një pjesë të madhe të fatkeqësive në këtë botë,” tha Johann Wadephul për transmetuesin publik ARD gjatë vizitës së tij në Uashington, DC.

Wadephul akuzoi qeverinë iraniane se po shtyp demonstratat dhe po përdor forcë të tepruar kundër protestuesve, duke pretenduar se ajo e ka humbur legjitimitetin për të qeverisur vendin.

“Ky regjim duhet të izolohet fuqishëm,” tha Wadephul, duke shtuar se Berlini i ka intensifikuar përpjekjet diplomatike për të vendosur sanksione më të ashpra dhe për ta futur Gardën Revolucionare në listën e BE-së të sanksioneve kundër terrorizmit.

I pyetur për paralajmërimet e presidentit amerikan Donald Trump ndaj Iranit dhe spekulimet për një ndërhyrje të mundshme ushtarake, Wadephul tha se i ka diskutuar zhvillimet e fundit me Sekretarin amerikan të Shtetit, Marco Rubio.

“Nuk e di se cili do të jetë vendimi përfundimtar këtu. Ne e kemi diskutuar këtë çështje dhe më është thënë vetëm se ende nuk është marrë një vendim përfundimtar. Regjimi në Iran e ka kuptuar se ky president është i aftë dhe gjithashtu i gatshëm të ndërmarrë masa të tilla. Këtë e kemi vëzhguar gjatë javëve të fundit,” tha ai.

Gjermania, një aleate kyç e Izraelit, ka ndjekur një qasje të ashpër ndaj qeverisë iraniane mes protestave të gjera në vend. Kancelari Friedrich Merz ka deklaruar se regjimi në Teheran po jeton “ditët dhe javët e tij të fundit”.

Ambasadori i Iranit u thirr të martën në Ministrinë e Jashtme të Gjermanisë. “Veprimet brutale të regjimit iranian kundër popullit të vet janë tronditëse,” thuhet në një deklaratë të ministrisë. “Ne i bëjmë thirrje Iranit të ndalë dhunën ndaj qytetarëve të tij dhe të respektojë të drejtat e tyre.”

Irani është tronditur nga valë protestash që nga muaji i kaluar, duke filluar më 28 dhjetor në Pazarin e Madh të Teheranit, për shkak të zhvlerësimit të fortë të rialit iranian dhe përkeqësimit të kushteve ekonomike. Demonstratat më pas u përhapën në disa qytete të tjera.

Zyrtarët qeveritarë kanë akuzuar SHBA-në dhe Izraelin se qëndrojnë pas “trazirave” dhe “terrorizmit”.

Nuk ka shifra zyrtare për viktimat, por Agjencia e Lajmeve të Aktivistëve për të Drejtat e Njeriut (HRANA), një grup për të drejtat e njeriut me bazë në ShBA, vlerëson se më shumë se 2,500 persona janë vrarë, përfshirë forca sigurie dhe protestues, ndërsa mbi 1.100 të tjerë janë plagosur.

Grupi gjithashtu thotë se më shumë se 18.000 persona janë arrestuar, megjithëse këto shifra nuk janë verifikuar në mënyrë të pavarur dhe ndryshojnë nga vlerësime të tjera.