Shoqata “EuroPalestine” me seli në Francë bëri thirrje të mërkurën për bojkotimin e hurmave të shitura në vend, të cilat prodhohen në vendbanimet e paligjshme izraelite në Bregun Perëndimor të pushtuar.

Shoqata, e cila mbron të drejtat e palestinezëve, ka vazhduar thirrjen e saj për të bojkotuar produktet izraelite gjatë muajit të bekuar të Ramazanit, kur konsumi i hurmave rritet ndjeshëm.

Duke folur për Anadolu, presidentja e shoqatës, Olivia Zemor tha se një pjesë e madhe e hurmave të markës “Medjool” të shitura në Francë “vijnë nga vendbanime të paligjshme izraelite ose kompani bashkëpunëtore në pushtim”.

Zemor tha se disa kuti tregojnë Jordaninë ose Marokun si vend origjine, por pretendon se produktet në fakt janë izraelite.

Ajo vuri në dukje se si pjesë e fushatës së bojkotit, disa vullnetarë kanë kryer aktivitete ndërgjegjësimi në supermarkete për të informuar konsumatorët, duke theksuar se qëllimi i tyre është të inkurajojnë konsumin e produkteve alternative.

Duke kujtuar se sipas rregulloreve franceze, shitësit duhet të tregojnë qartë vendin e origjinës, veçanërisht për frutat e thata, Zemor nënvizoi se produktet me origjinë nga territoret e pushtuara palestineze nuk mund të etiketohen si “Izrael”.

Ajo argumentoi se bojkotimi i këtyre produkteve ka ndikim negativ në ekonominë izraelite, duke shtuar se disa kompani shumëkombëshe ushqimore janë gjithashtu midis “objektivave të bojkotit”.