Gjermania mund të tërhiqet nga Eurovision Song Contest 2026 nëse Izraeli përjashtohet, sipas deklaratës së kancelarit gjerman Friedrich Merz.

“Unë do ta mbështesja këtë. Mendoj se është një skandal që kjo çështje po diskutohet. Izraeli ka vendin e tij atje”, tha Merz të dielën, duke iu referuar mundësisë së bojkotit të ngjarjes në rast se Izraeli përjashtohet.

Duke folur për transmetuesin publik ARD, Merz theksoi se solidariteti i Gjermanisë me Izraelin nuk është vënë kurrë në dyshim.

“Ndjenjat e mia personale ndaj Izraelit janë krejtësisht pozitive. Është një vend i mrekullueshëm. Megjithatë, sipas mendimit tim, disa nga veprimet ushtarake në luftën e Gazës kanë shkuar shumë larg”, shtoi ai.

Merz, një aleat i fortë i Izraelit, ka argumentuar vazhdimisht se Gjermania mban përgjegjësi historike ndaj Izraelit për shkak të së kaluarës naziste dhe Holokaustit.

Edhe pse kohët e fundit ai kritikoi fushatën ushtarake të Izraelit në Gaza dhe bëri thirrje për rritjen e ndihmës humanitare, ai hodhi poshtë kërkesat e opozitës për një embargo armësh dhe u kundërshtua pezullimit të marrëveshjes tregtare BE-Izrael.

Muajin e kaluar, qeveria e Merzit mbeti e izoluar diplomatikisht, pasi disa aleatë të ngushtë, Franca, Britania, Belgjika, Portugalia dhe Malta, iu bashkuan më shumë se 140 vendeve të tjera që njohën shtetin palestinez, ndërsa Berlini vazhdoi ta kundërshtonte një vendim të tillë.

Një votim online në nëntor, përpara afatit të dhjetorit për konfirmimin e pjesëmarrjes në Eurovision, do t’u mundësojë të gjitha shteteve konkurruese të vendosin nëse Izraeli do të përjashtohet nga konkursi i vitit 2026.

Gjermania është ndër kontribuesit financiarë më të mëdhenj të Eurovisionit, së bashku me Francën, Italinë, Spanjën dhe Mbretërinë e Bashkuar.

Franca ka konfirmuar pjesëmarrjen e saj në konkursin e ardhshëm, ndërsa Spanja u bë shteti i parë që njoftoi se do të tërhiqet nëse Izraeli nuk ndalohet nga Eurovision 2026.

Irlanda, Sllovenia dhe Holanda kanë deklaruar tashmë qartë se nuk do të marrin pjesë në garë nëse Izraeli pranohet, ndërsa Islanda, Belgjika dhe Polonia kanë sinjalizuar se mund të ndërmarrin hapa të ngjashëm.

Konkursi i vitit të ardhshëm është planifikuar të mbahet në maj 2026, në Vjenë të Austrisë.