Rusia dhe Ukraina akuzuan të hënën njëra-tjetrën për sulme ajrore gjatë natës që vranë tre persona dhe plagosën shtatë të tjerë.

Ministria e Mbrojtjes e Rusisë tha në një deklaratë se mbrojtja ajrore rrëzoi 152 dronë ukrainas gjatë natës, përfshirë 65 mbi rajonin e Belgorodit pranë kufirit me Ukrainën.

Guvernatori i rajonit Belgorod, Vyacheslav Gladkov tha se sulmi gjatë natës shkaktoi "dëme të konsiderueshme" në infrastrukturën energjetike.

"Banorët po përjetojnë ndërprerje të energjisë elektrike, ujit dhe ngrohjes. Shkalla e plotë e dëmit do të vlerësohet gjatë orëve të ditës", shkroi ai në aplikacionin rus të mesazheve Max, duke shtuar se një grua u plagos në lagjen Yakovlevsky.

Ndërkohë, Ukraina akuzoi Rusinë për lëshimin e një rakete dhe 126 dronëve gjatë natës, me 105 dronë të neutralizuar, sipas një deklarate të Forcave Ajrore të Ukrainës.

Kreu i administratës ushtarake rajonale të Odesës, Oleg Kiper tha në Telegram se dy persona u vranë dhe të paktën tre u plagosën në sulmet ruse në qytetin port, të cilat dëmtuan gjithashtu infrastrukturën industriale, energjetike dhe civile.

"Sulmi dëmtoi ambientet e prodhimit dhe magazinës, ndërtesat administrative, një punishte makinash dhe automjete”, tha ai, duke shtuar se një nga dronët goditi një apartament në një ndërtesë shumëkatëshe, por nuk shpërtheu.

Sipas kreut të Administratës Ushtarake Rajonale Zaporizhzhia, Ivan Fedorov, një sulm në Zaporizhzhia dëmtoi një strukturë të infrastrukturës industriale, duke vrarë një person dhe duke plagosur një tjetër.

Në Kharkiv, dy persona u plagosën në një sulm rus, tha Oleg Sinegubov, kreu i administratës ushtarake rajonale, në një deklaratë të publikuar në Telegram.

Verifikimi i pavarur i pretendimeve nga Rusia dhe Ukraina mbetet i vështirë për shkak të konfliktit të vazhdueshëm.